"1941-1945-ci illər Böyük Vətən müharibəsində Qələbənin 60 illiyi" yubiley medalı ilə təltif haqqında

AZƏRBAYCAN RESPUBLİKASI PREZİDENTİNİN SƏRƏNCAMI

Faşizmə qarşı 1941-1945-ci illər Böyük Vətən müharibəsinin Azərbaycandan olan iştirakçılarının göstərdikləri qəhrəmanlıq və şücaətinə görə, faşizm üzərində Qələbənin 60 illiyi ilə əlaqədar "1941-1945-ci illər Böyük Vətən müharibəsində Qələbənin 60 illiyi" yubiley medalının təsis edilməsi haqqında MDB iştirakçısı olan dövlətlərin razılığına uyğun olaraq qərara alıram:

1. Aşağıdakı şəxslər "1941-1945-ci illər Böyük Vətən müharibəsində Qələbənin 60 illiyi" yubiley medalı ilə təltif edilsinlər:

SSRİ Silahlı Qüvvələri sıralarında Böyük Vətən müharibəsi cəbhələrində döyüş əməliyyatlarında iştirak etmiş hərbi qulluqçular və muzdla xidmət etmiş mülki şəxslər, faşist işğalçılarına qarşı gizli mübarizə aparan şəxslər, Böyük Vətən Müharibəsi dövründə SSRİ Silahlı Qüvvələrində xidmət etmiş hərbi qulluqçular və muzdla xidmət etmiş mülki şəxslər, "1941-1945-ci illər Böyük Vətən müharibəsində Almaniya üzərində qələbəyə görə", "Yaponiya üzərində qələbəyə görə" medalları ilə təltif olunmuş, "1941-1945-ci illər Böyük Vətən müharibəsində Qələbəyə görə" medalının vəsiqəsi, yaxud müharibə iştirakçısı vəsiqəsi olan şəxslər;

Böyük Vətən müharibəsi illərində fədakar əməyə görə SSRİ ordenləri, "1941-1945-ci illər Böyük Vətən müharibəsində rəşadətli əməyə görə", "Əmək igidliyinə görə", "Əməkdə fərqlənməyə görə", "Leninqradın müdafiəsinə görə", "Moskvanın müdafiəsinə görə", "Odessanın müdafiəsinə görə", "Stalinqradın müdafiəsinə görə", "Kiyevin müdafiəsinə görə", "Qafqazın müdafiəsinə görə", "Sovet Zapolyaryesinin müdafiəsinə görə" medalları ilə təltif olunmuş şəxslər, habelə "Blokadada olan Leninqradın sakininə" nişanı, yaxud "1941-1945-ci illər Böyük Vətən müharibəsində rəşadətli əməyinə görə" medalının vəsiqəsi olan şəxslər.

2. Bu Sərəncam imzalandığı gündən qüvvəyə minir.

İlham ƏLİYEV,

Azərbaycan Respublikasının Prezidenti

Bakı şəhəri, 27 aprel 2005-ci il

№ 785