Aktın növü	AZƏRBAYCAN RESPUBLİKASI DÖVLƏT STATİSTİKA KOMİTƏSİNİN QƏRARI
Qəbul edildiyi tarix	04.07.2017
Qeydiyyat nömrəsi	11/18
Adı	“Səyahət agentlikləri, turoperatorlar və turizm sahəsində  əvvəlcədən sifarişetmə xidmətləri göstərən müəssisələrin fəaliyyəti haqqında” 1-turizm №-li (illik) rəsmi statistika hesabatı forması və  onun doldurulmasına dair göstəriş barədə
Rəsmi dərc edildiyi mənbə
Qüvvəyə minmə tarixi	12.07.2017
Azərbaycan Respublikasının Vahid hüquqi təsnifatı üzrə indeks kodu	100.060.020
Hüquqi Aktların Dövlət Reyestrinin qeydiyyat nömrəsi	15201707041118
Hüquqi aktın Hüquqi Aktların Dövlət Reyestrinə daxil edildiyi tarix	11.07.2017

 

Azərbaycan Respublikası Prezidentinin 2009-cu il 24 iyun tarixli, 115 nömrəli Fərmanı ilə təsdiq edilmiş “Azərbaycan Respublikasının Dövlət Statistika Komitəsi haqqında Əsasnamə”nin 9.6-cı və 14.4-cü bəndlərini rəhbər tutaraq Azərbaycan Respublikasının Dövlət Statistika Komitəsi

 

qərara alır:

 

1. “Səyahət agentlikləri, turoperatorlar və turizm sahəsində əvvəlcədən sifarişetmə xidmətləri göstərən müəssisələrin fəaliyyəti haqqında” 1-turizm №-li (illik) rəsmi statistika hesabatı forması təsdiq edilsin (əlavə 1).

2. “Səyahət agentlikləri, turoperatorlar və turizm sahəsində əvvəlcədən sifarişetmə xidmətləri göstərən müəssisələrin fəaliyyəti haqqında” 1-turizm №-li (illik) rəsmi statistika hesabatı formasının doldurulmasına dair göstəriş” təsdiq edilsin (əlavə 2).

3. Qərar qəbul edildiyi gündən üç gün müddətində Azərbaycan Respublikasının Hüquqi Aktların Dövlət Reyestrinə daxil edilməsi üçün Azərbaycan Respublikasının Ədliyyə Nazirliyinə təqdim edilsin.

4. “Turizm fəaliyyəti haqqında” 1-turizm №-li yarımillik, illik rəsmi statistika hesabatı forması və onun doldurulmasına dair göstəriş haqqında” Azərbaycan Respublikası Dövlət Statistika Komitəsinin 2013-cü il 18 iyul tarixində 15201307099609 qeydiyyat nömrəsi ilə Azərbaycan Respublikasının Hüquqi Aktların Dövlət Reyestrinə daxil edilmiş 2013-cü il 9 iyul tarixli 96/09 nömrəli qərarı (3-cü hissə istisna olmaqla) ləğv edilsin.

5. Aparatın Xidmət statistikası şöbəsinə tapşırılsın ki, bu qərardan irəli gələn məsələləri həll etsin.

6. Qərarın icrasına nəzarət Statistika işlərinin əlaqələndirilməsi və strateji planlaşdırma şöbəsinə həvalə edilsin.

 

Sədr                                                                                                 Tahir Budaqov

 

 

 

 

 

I bölmə. Müəssisənin (təşkilatın) fəaliyyətinin ümumi iqtisadi göstəriciləri 

 

 

II bölmə. Satılmış turizm yollayışları  

 

 

III bölmə. Azərbaycana gələn və gedən turistlərin bölgüsü   

 

 

IV bölmə. Ölkə daxilində səyahət edən Azərbaycan Respublikasının vətəndaşları

 

 

 

 

 

“Səyahət agentlikləri, turoperatorlar və turizm sahəsində əvvəlcədən sifarişetmə xidmətləri göstərən müəssisələrin fəaliyyəti haqqında” 1-turizm №-li (illik) rəsmi statistika hesabatı formasının doldurulmasına dair

 

GÖSTƏRİŞ

 

1. Ümumi müddəalar

1-turizm №-li (illik) rəsmi statistika hesabatı forması səyahət agentlikləri, turoperatorlar və turizm sahəsində əvvəlcədən sifarişetmə xidmətləri göstərən sahibkarlıq subyektlərinin gəlir və xərcləri, əhaliyə satılmış turizm yollayışlarının sayı və dəyəri, turizm yollayışlarından istifadə etməklə ölkə daxilində və xarici ölkələrə səyahət edən Azərbaycan Respublikası vətəndaşlarının sayı və s. məlumatların əldə edilməsi üçün nəzərdə tutulmuşdur.

Hesabatı turizm məhsulunu (turları) formalaşdıran, satan və turizm sahəsində əvvəlcədən sifarişetmə xidmətləri göstərən müəssisələr fevral ayının 15-dək yerləşdiyi rayonun (şəhərin) statistika orqanına və ya elektron formada  www.stat.gov.az  internet səhifəsində real-vaxt rejimində təqdim edir.

2. Əsas anlayışlar

Turizm - Azərbaycan Respublikası vətəndaşlarının, əcnəbilərin və vətəndaşlığı olmayan şəxslərin müvəqqəti olacağı ölkədə (yerdə) ödənişli fəaliyyətlə məşğul olmamaq şərtilə istirahət, sağlamlaşdırma, tanış olma, idrakı (tarix və mədəniyyət sərvətlərindən bəhrələnmə və sair), iş-peşə (vəzifə borclarının icra edilməsi istisna olmaqla), idman və dini məqsədlərlə daimi yaşayış yerlərindən müvəqqəti getmələridir (səyahətləri);

Turist - istirahət, sağlamlaşdırma, tanış olma, idrakı (tarix və mədəniyyət sərvətlərindən bəhrələnmə və sair), iş-peşə (vəzifə borclarının icra edilməsi istisna olmaqla), idman və dini məqsədlərlə getdiyi ölkədə (yerdə) ödənişli fəaliyyətlə məşğul olmamaq şərtilə, 24 saatdan 12 ayadək müddətdə müvəqqəti olan şəxsdir;

Tur - konkret müddətdə konkret marşrut üzrə fərdi və ya qrup halında səfərdən ibarət olan, turizm məhsulunun vauçer şəklində satılan formasıdır;

Turizm yollayışı - ciddi hesabatlı blank olub, proqramda nəzərdə tutulmuş xidmətlərin ödənildiyini təsdiq edən sənəddir;

Turoperator - turların komplektləşdirilməsi, turizm məhsulunun formalaşdırılması, hərəkətə gətirilməsi və satışı ilə məşğul olan turizm təşkilatıdır;

Turagentlik - turizm və ekskursiya yollayışlarının satışı, habelə turizm-ekskursiya fəaliyyətinin təşkili üzrə (informasiya, reklam, marketinq və s.) digər xidmətlər göstərilməsi ilə məşğul olan vasitəçi təşkilatdır;

Turizm məhsulu - turistlərə göstərilən xidmətlər kompleksidir (turistlərin yerləşdirilməsi, daşınması, yeməyi üzrə xidmətlər kompleksi, ekskursiya, həmçinin bələdçi (bələdçi-tərcüməçi) xidmətləri və səfərin məqsədlərindən asılı olaraq göstərilən digər xidmətlər).

 

3. Hesabat formasının doldurulmasına dair izahlar

01-ci sətirdə turizm müəssisəsinin əsas fəaliyyət növü “X” ilə  işarə edilir. Bu zaman il ərzində daha çox gəlir gətirmiş fəaliyyət növü qeyd edilməlidir.

I bölmədə 02-ci sətrin 1-ci sütununda ƏDV, aksiz vergiləri çıxılmaqla xidmətlərin (məhsulların) satışından əldə edilən gəlirin məbləği göstərilir. Burada turagentliklər və turizm sahəsində əvvəlcədən sifarişetmə xidmətləri göstərən təşkilatlar komisyon haqlarının, agentlik xidmətlərindən əldə olunmuş vəsaitin və digər mükafatların məbləğini, müxtəlif əyləncə tədbirlərində iştirak üçün, nəqliyyat xidmətlərindən istifadə üçün satılmış biletlərin alışla satışı arasındakı qiyməti fərqini qeyd edirlər.

03-cü sətrin 1-ci sütununda təşkilatın məhsul (xidmət) istehsalına çəkdiyi xərclərin dəyəri göstərilir. Bu sətrin 1-ci sütun üzrə məlumatları 04-cü və 11-15-ci sətirlərin 1-ci sütunlarının məlumatlarının cəminə bərabər olmalıdır. 04-cü sətrin 1-ci sütununda turizm məhsulunun (turların) istehsalı zamanı kənar təşkilatların göstərdiyi xidmətlərə görə onlara ödənilən xərclərin məbləği qeyd edilir, bu sətrin məlumatları 05-10-cu sətirlərin   1-ci sütun üzrə məlumatlarının cəminə bərabərdir. 15-ci “digər xərclər” sətrinin 1-ci sütununda enerji, suyun alınması, ezamiyyə və s. xərclərin məbləği qeyd olunur.

16-cı sətrin 1-ci sütununda  turizm mövsümü ilə əlaqədar qəbul edilmiş müvəqqəti işçilər də nəzərə alınmaqla işçilərin orta illik sayı əks olunur. 17-ci sətrin 1-ci sütununda işçilərin ümumi orta illik sayından qadınların sayı qeyd edilir. 18-ci sətrin 1-ci sütununda turizm sahəsində təhsili olan işçilərin sayı əks olunur. Bu işçilərə turizm sahəsi üzrə müvafiq təhsil proqramının bitirilməsini təsdiq edən ali təhsil, orta ixtisas və peşə təhsili diplomu və ya sertifikatı olan şəxslər aid edilir. [2]

II bölmədə 19-cu sətrin 1-ci sütununda qrup formasında, 2-ci sütununda isə fərdi formada satılmış turizm yollayışı blanklarının sayı qeyd edilir. 4-cü və 5-ci sütunlarda müvafiq olaraq həmin yollayışların dəyəri yazılır. Bu bölmədə bütün sətirlər üzrə 3-cü sütunun məlumatları 1-ci və 2-ci sütunların məlumatlarının cəminə, 6-cı sütunun məlumatları isə 4-cü və 5-ci sütunların məlumatlarının cəminə bərabər olmalıdır.

III bölmənin 1-ci sütununda Azərbaycan Respublikasına gələn əcnəbi və vətəndaşlığı olmayan turistlərin, 2-ci sütununda tur-günlərin sayı, 3-cü sütununda xarici ölkələrə səfər edən Azərbaycan turistlərinin sayı, 4-cü sütununda isə tur-günlərin sayı qeyd edilir. 1-4-cü sütunlar üzrə 23-cü sətrin məlumatları 24-54-cü sətirlərin məlumatlarının cəminə bərabər olmalıdır.

Hesabat formasının IV bölməsində səyahət agentlikləri və turoperatorlar tərəfindən ölkə ərazisində səyahətə göndərilmiş Azərbaycan Respublikası vətəndaşlarına dair məlumatlar əks olunur. B sütununda turistlərin (ekskursiyaçıların) səyahət etmək üçün göndərildiyi rayonun (şəhərin) adı, 1-ci sütunda bu rayona (şəhərə) göndərilən turistlərin, 2-ci sütunda tur-günlərin və 3-cü sütunda ekskursiyaçıların sayı qeyd edilir. Səfər edən şəxs getdiyi yerdə bir və ya bir neçə gecələmə keçirdikdə turist, gecələmə keçirmədiyi halda isə ekskursiyaçı kimi qeydə alınır.

Hesabatın tərtib olunmasına sərf edilən vaxt adam-saatla müəyyənləşdirilir və  dövr ərzində hesabatın tərtib olunmasında iştirak edən işçilərin sayını hesabatın tərtib olunmasına sərf etdikləri vaxta vurmaqla tapılır.

 

İSTİFADƏ OLUNMUŞ MƏNBƏ SƏNƏDLƏRİNİN SİYAHISI

 

1. 14 yanvar 2019-cu il tarixli 4/15 nömrəli Azərbaycan Respublikası Dövlət Statistika Komitəsinin Qərarı (Hüquqi Aktların Dövlət Reyestrinin qeydiyyat nömrəsi 15201901140415, Hüquqi Aktların Dövlət Reyestrinə daxil edildiyi tarix 28 yanvar 2019-cu il)

 

QƏRARA EDİLMİŞ DƏYİŞİKLİK VƏ ƏLAVƏLƏRİN SİYAHISI