Aktın növü	AZƏRBAYCAN RESPUBLİKASI SƏHİYYƏ NAZİRLİYİ KOLLEGİYASININ QƏRARI
Qəbul edildiyi tarix	18.01.2013
Qeydiyyat nömrəsi	3
Adı	“Səhiyyə müəssisələrində həkimlərin müsabiqə yolu ilə mərkəzləşdirilmiş qaydada işə qəbulu Qaydaları”nın təsdiq edilməsi barədə
Rəsmi dərc edildiyi mənbə
Qüvvəyə minmə tarixi	01.02.2013
Azərbaycan Respublikasının Vahid hüquqi təsnifatı üzrə indeks kodu	220.010.000
Hüquqi Aktların Dövlət Reyestrinin qeydiyyat nömrəsi	15201301180003
Hüquqi aktın Hüquqi Aktların Dövlət Reyestrinə daxil edildiyi tarix	31.01.2013

 

Azərbaycan Respublikası Prezidentinin 2006-cı il 25 may tarixli 413 nömrəli Fərmanı ilə təsdiq edilmiş “Azərbaycan Respublikasının Səhiyyə Nazirliyi haqqında Əsasnamə”nin 14.5-ci bəndini, “Normativ hüquqi aktlar haqqında” Azərbaycan Respublikası Konstitusiya Qanununun 20-ci maddəsini rəhbər tutaraq Azərbaycan Respublikası Prezidentinin 2012-ci il 5 sentyabr tarixli 2421 nömrəli sərəncamı ilə təsdiq edilmiş “Korrupsiyaya qarşı mübarizəyə dair 2012-2015-ci illər üçün Milli Fəaliyyət Planı”nın 22.4-cü bəndinin icrasını təmin etmək məqsədilə Azərbaycan Respublikası Səhiyyə Nazirliyinin Kollegiyası

 

qərara alır:

 

1. “Səhiyyə müəssisələrində həkimlərin müsabiqə yolu ilə mərkəzləşdirilmiş qaydada işə qəbulu Qaydaları” təsdiq edilsin (əlavə olunur).

2. Hüquq və daxili nəzarət sektorunun müdiri vəzifəsini icra edən E.Əzizova tapşırılsın ki, bu qərar 3 gün müddətində Azərbaycan Respublikasının Hüquqi Aktların Dövlət Reyestrinə daxil edilməsi üçün Azərbaycan Respublikasının Ədliyyə Nazirliyinə təqdim edilsin.

3. Azərbaycan Respublikası Səhiyyə Nazirliyinin 30.12.2012-ci il tarixli 126 nömrəli əmrinin 1-ci hissəsi ləğv edilsin.

4. Qərarın icrasına nəzarət Nazir müavinlərinə həvalə edilsin.

 

 

Kollegiyanın sədri, Nazir	Oqtay Şirəliyev
Kollegiyanın məsul katibi	Nərgiz Şahbazova

 

 

 

 

 

Səhiyyə müəssisələrində həkimlərin müsabiqə yolu ilə mərkəzləşdirilmiş qaydada işə qəbulu

QAYDALARI

 

1. Ümumi müddəalar

 

1.1.    Bu Qaydalar Azərbaycan Respublikası Prezidentinin 2012-ci il 5 sentyabr tarixli 2421 nömrəli sərəncamı ilə təsdiq edilmiş “Korrupsiyaya qarşı mübarizəyə dair 2012-2015-ci illər üçün Milli Fəaliyyət Planı”nın 22.4-cü bəndinin icrasını təmin etmək məqsədi ilə hazırlanmışdır və Azərbaycan Respublikasının Səhiyyə Nazirliyinin (bundan sonra - Səhiyyə Nazirliyi) tabeliyində olan səhiyyə müəssisələrində vakant elan edilmiş vəzifələrə həkimlərin mərkəzləşdirilmiş qaydada işə qəbulu qaydalarını müəyyən edir.

1.2.    Hər bir namizədin bilik səviyyəsinin, peşə hazırlığının, ümumi dünyagörüşünün, səhiyyə müəssislərində işləməyə layiqli olmasının müəyyən edilməsi məqsədi ilə aşkarlıq şəraitində şəffaf üsullarla müsabiqə keçirilir.[1]

1.3.    Səhiyyə müəssisələrində həkim ixtisası üzrə nəzərdə tutulmuş vəzifələrə şəxslər müsabiqə əsasında qəbul edilirlər. Müsabiqə test imtahanından və müsahibədən ibarətdir.[2]

Bu qaydalar səhiyyə müəssisələrinin rəhbərləri və onların müavinlərinə, həmçinin  müəssisələrin struktur bölmələrinin rəhbərlərinə, dövlət proqramı ilə xaricdə təhsil almış şəxslərə şamil edilmir.[3]

 

2. Müsabiqənin təşkili[4]

 

2.1.     Səhiyyə müəssisələrində vakant elan edilmiş həkim ixtisasları üzrə vəzifələrə həkimlərin mərkəzləşdirilmiş qaydada işə qəbulu tərkibi Azərbaycan Respublikasının səhiyyə naziri tərəfindən müəyyən edilmiş komissiya tərəfindən həyata keçirilir.[5]

2.2.     Komissiya üzvlərinin səlahiyyət müddəti 5 ildir. Səlahiyyət müddəti bitmiş üzvlər yenidən bu komissiyanın tərkibinə daxil edilə bilərlər.[6]

2.3.     Komissiya müsabiqənin keçirilməsi üçün vakant elan edilmiş vəzifələrə uyğun mütəxəssisləri cəlb edir. Müsabiqənin keçirilməsinə cəlb oluna bilən mütəxəssislərin siyahısı Azərbaycan Respublikasının səhiyyə naziri tərəfindən təsdiq edilir.[7]

2.4.     Komissiyanın üzvlərinin aşağıdakı hüquqları vardır:

2.4.1.    komissiyanın səlahiyyətlərinə aid məsələlərin həllində iştirak etmək və təkliflər vermək;

2.4.2.    komissiyanın iclaslarında iştirak etmək, iclasın aparılmasına dair fikirlərini bildirmək, suallar vermək;

2.4.3.    komissiyanın qərar, protokol və digər sənədləri ilə tanış olmaq;

2.4.4.    qəbul edilməsi təklif olunan qərara dair fikir söyləmək;

2.4.5. qəbul edilməsi təklif olunan qərarın lehinə və ya əleyhinə səs vermək, qərarla razılaşmadıqda xüsusi rəy vermək.

2.5. Komissiyanın üzvlərinin vəzifələri aşağıdakılardır:

2.5.1.    komissiyanın iclaslarını üzrsüz səbəbdən buraxmamaq;

2.5.2.    komissiyanın iclaslarında baxılan məsələlər üzrə səsvermədə iştirak etmək;

2.5.3.      komissiya üzvünün adına və qərəzsizliyinə xələl gətirə biləcək hərəkətlərə və çıxışlara yol verməmək;

2.5.4.      komissiyanın iclaslarında baxılan məsələlər üzrə konfidensiallığa əməl etmək.

2.6. Komissiya üzvlərinin səlahiyyətlərinə aşağıdakı hallarda vaxtından əvvəl xitam verilir:

2.6.1.    tutduğu vəzifədən azad olunduqda;

2.6.2.    öz arzusu ilə komissiya üzvlüyündən çıxmaq barədə yazılı ərizə verdikdə;

2.6.3.    bu Qaydaların 2.5-ci bəndində göstərilən vəzifələri icra etmədikdə;

2.6.4.    vəfat etdikdə, habelə məhkəmə tərəfindən xəbərsiz itkin düşmüş hesab edildikdə və ya ölmüş elan edildikdə;

2.6.5.    vəzifə səlahiyyətlərinin icrasından kənarlaşdırıldıqda;

2.7. Komissiyanın üzvləri başqa vəzifəyə keçirildikdə, onların səlahiyyətlərinə vaxtından əvvəl xitam verilməsi məsələsinə Azərbaycan Respublikasının səhiyyə naziri və ya onun müəyyən etdiyi səlahiyyətli şəxs tərəfindən baxılır.

2.8. Səlahiyyətlərinə vaxtından əvvəl xitam verilmiş Komissiyanın üzvünün yerinə yeni üzv onun səlahiyyət müddətinin qalmış hissəsinə bu Qaydaların 2.1-ci bəndinə uyğun olaraq təyin edilir.

2.9. Komissiya öz fəaliyyətini iclaslar vasitəsi ilə həyata keçirir.

2.10.     Komissiyanın iclasları üzvlərinin yarısından çoxu iştirak etdikdə səlahiyyətlidir. İclasların vaxtı, yeri və müzakirəyə çıxarılan məsələlər barədə komissiya üzvlərinə qabaqcadan məlumat verilir.

2.11.     Sədr olmadıqda Komissiyanın iclaslarına sədr müavini sədrlik edir.

2.12.      Komissiyanın iclaslarında baxılan məsələlər üzrə qərarlar açıq səsvermə və sadə səs çoxluğu ilə qəbul edilir. Sədr sonuncu səs verir və səslər bərabər olduqda, onun səsi həlledicidir. Qərarlar iclaslarda iştirak edən bütün komissiya üzvləri tərəfindən imzalanır. Komissiya üzvünün xüsusi rəyi olduqda, rəy qərara əlavə edilir.

2.13.      Komissiyanın işinə müdaxilə yolverilməzdir.

2.14. Komissiya işinin kargüzarlıq və texniki təminatını Səhiyyə Nazirliyinin Kadrlar, elm və təhsil şöbəsi həyata keçirir.[8]

 

3. Sənədlərin qəbulu

 

3.1. “Azərbaycan Respublikasında tibb və əczaçılıq fəaliyyəti ilə məşğul olmaq hüququ olan şəxslərin dövlət reyestri”, o cümlədən tibb idarə və müəssisələrindən alınan məlumatlar əsasında Səhiyyə Nazirliyinin Kadrlar, elm və təhsil şöbəsi tərəfindən vakant vəzifələrə işə qəbul üçün müsabiqə barədə məlumat onun başlamasına azı bir ay qalmış nazirliyin rəsmi internet səhifəsində yerləşdirilir. Müsabiqə barədə məlumat mətbuatda da dərc oluna bilər.[9]

3.2.       Müsabiqədə iştirak üçün namizəd Səhiyyə Nazirliyinin rəsmi internet səhifəsində müvafiq elektron xidmət bölməsinə daxil olaraq elektron ərizənin doldurulması və bu Qaydaların 3.3-cü bəndində göstərilmiş sənədlərin skan edilmiş surətinin daxil edilməsi yolu ilə müraciət edir.[10]

3.3.       Qanunla nəzərdə tutulmuş hallarda sertifikasiyadan keçirilməyən şəxslər ali təhsil haqqında sənədin və olduğu halda, ixtisaslaşma haqqında sənədin surətlərini ərizələrinə əlavə edirlər (ərizə forması əlavə olunur).

3.3.1.    vahid forma üzrə ərizə (əlavə olunur);

3.3.2.    tərcümeyi-hal;

3.3.3.    ali təhsil haqqında sənədin (diplomun) surəti (xarici dövlətlərin ali təhsil sahəsində ixtisasları Azərbaycan Respublikasında ekvivalentliyi müəyyən edilməklə (nostrifikasiya olunmaqla), işə buraxılma haqqında şəhadətnamə də daxil olmaqla);

3.3.4.    ixtisaslaşma haqqında sənədin surəti (olduğu halda);

3.3.5.    sertifikasiya şəhadətnaməsinin surəti (sertifikasiyadan keçməkdən qanunvericiliklə nəzərdə tutulmuş azad olma halları istisna olmaqla);

3.3.6.    şəxsiyyət vəsiqəsinin surəti;

3.3.7. əmək kitabçasının notariat qaydasında və ya kadrlar xidməti tərəfindən təsdiq olunmuş surəti (ilk dəfə əmək fəaliyyətinə başlayanlar istisna olmaqla);

3.3.8. sağlamlıq barədə ərazi poliklinikasının arayışı.[11]

3.4.    Müraciət edən şəxs özünü xarakterizə edən başqa sənədləri də təqdim edə bilər.[12]

3.5.    Namizəd işə qəbul olunmaq üçün ixtisasına və ya əsas (baza ali) tibb təhsilinə uyğun 5 (beş) vakant yer seçə bilər. Namizədlərə dair tələblər vakant yerlərin vəzifə təlimatlarına uyğun olaraq tənzimlənir.[13]

3.6. Müraciət edildiyi gündən 3 (üç) gün ərzində sənədlərin tamlığı, onların namizədin ərizəsində əks olunan məlumatlara uyğunluğu Səhiyyə Nazirliyinin Kadr, elm və təhsil şöbəsi tərəfindən yoxlanılır. Bu Qaydalara uyğun olmayan sənədlər qəbul edilmir.

3.7. Çatışmazlıqlar aradan qaldırıldıqdan sonra bu qaydaların 3.8-ci bəndində göstərilən müddətdə sənədlər yenidən təqdim oluna bilər. Namizədin təqdim etdiyi elektron poçt ünvanına sənədlərinin qəbulu barədə məlumat göndərilir.[14]

3.8.       Sənədlərin qəbulu 10 (on) iş günü ərzində aparılır. Qəbul müddəti başa çatdıqdan sonra təqdim olunan (göndərilən) sənədlər (göstərilən müddət üçün poçtla göndərilən sənədlər istisna olmaqla) qəbul edilmir.[15]

3.9.       Həkim vəzifəsinə qəbul edilmək üçün qanunvericiliklə müəyyən edilmiş şərtlərə cavab verməyən, habelə bilərəkdən yanlış məlumatlar vermiş namizədlər müsabiqədən kənarlaşdırılır.[16]

3.10. Təqdim edilmiş sənədlər bu Qaydaların tələblərinə uyğun olduqda namizəd barədə məlumat ümumi siyahıya daxil edilir.[17]

 

4. Müsabiqə

 

4.1. Müsabiqənin (imtahanın) keçirilməsinə 10 (on) gün qalmış namizəd Səhiyyə Nazirliyinin internet səhifəsində bu barədə məlumat yerləşdirmək yolu ilə və onun təqdim etdiyi elektron poçt vasitəsilə ünvanlarına yazmaqla Səhiyyə Nazirliyinin Kadr, elm və təhsil şöbəsi tərəfindən məlumatlandırılır.

4.2. Namizədə şəxsi eyniləşdirmə kodu verilir. Şəxsi eyniləşdirmə kodu rəqəmlə ifadə olunur və imtahan zamanı namizədin anonimliyinin qorunmasına xidmət edir.

4.3. İmtahana buraxılış vərəqəsi və yaddaş kitabçası namizədin elektron poçt ünvanına göndərilir.  İmtahana buraxılış vərəqəsində namizədin soyadı, adı, atasının adı qeyd olunur və imtahan keçirilən yerin ünvanı, tarix, vaxt, auditoriyanın nömrəsi göstərilir.

4.4. İmtahana gələn namizəd imtahana buraxılış vərəqəsini və şəxsiyyət vəsiqəsini özü ilə gətirməlidirlər. Göstərilən sənədlərin biri olmadıqda, həmin şəxs imtahana buraxılmır.

4.5. İmtahanın keçirilməsini təmin etmək məqsədi ilə Komissiya imtahan rəhbərini və imtahan nəzarətçilərini təyin edir. İmtahan nəzarətçilərinin sayı hər auditoriya üzrə iki nəfərdən az olmamalıdır.

4.6. İmtahanda yolverilməyən hərəkətlər, habelə imtahana gətirilməsi qadağan edilən əşyaların siyahısı yaddaş kitabçasına daxil edilir.

4.7. Namizəd imtahanın keçirilmə qaydalarını pozduqda, imtahanın rəhbəri və nəzarətçi tərəfindən bu barədə akt tərtib edilir və həmin şəxs imtahandan kənarlaşdırılır. Müvafiq pozuntular imtahan başa çatdıqdan sonra aşkar edilərsə, həmin şəxsin imtahan nəticələri Komissiya tərəfindən ləğv edilir.

4.8. İmtahan sualları test və klinik tapşırıq hissələrinə bölünür və konfidensiallıq gözlənilməklə, Komissiya tərəfindən üç mürəkkəblik dərəcəsi üzrə tərtib edilir. Hazırlanmış suallar toplusunda sualların sayı imtahanda istifadə ediləcək sualların sayından azı 10 dəfə çox olmalıdır. Suallar toplusu hər il 10 (on) faizdən aşağı olmayaraq yenilənir;

4.9. Komissiya imtahan suallarının test hissəsinə dair düzgün cavabların siyahısını tərtib edir və konfidensiallıq  gözlənilməsi şərtilə xüsusi ayrılmış yerdə bir nüsxədə Səhiyyə Nazirliyinin Kadr, elm və təhsil şöbəsi tərəfindən saxlanılması təmin edirlir.

4.10. İmtahan suallarının test hissəsi informasiya texnologiyaları və xüsusi optik cihazlar vasitəsilə oxunan və 40 (qırx) sualdan ibarət olan sual kitabçasında qeyd olunur. Sual kitabçasına daxil edilən sualların mürəkkəblik nisbəti Komissiya tərəfindən müəyyən edilir.

4.11. İmtahan suallarının klinik tapşırıq hissəsi namizədin ixtisasına aid, habelə onun praktiki bilik səviyyəsini və peşə vərdişlərini müəyyən edən 3 (üç) sualdan ibarət olur və sual kitabçasında qeyd olunur. Klinik tapşırıq hissəsi üzrə sualların məzmunu test imtahanında verilən sualların məzmunundan fərqlənməlidir.

4.12. İmtahanın sualları bilavasitə imtahan başlamazdan əvvəl Komissiya tərəfindən aşkar surətdə ümumi suallar toplusundan seçilir və 2 (iki) müxtəlif variantda hazırlanır. Bunun üçün suallar toplusu olan zərf müşahidəçilərin iştirakı ilə açılır və kompüterə daxil edilir. Kompüter verilmiş proqrama uyğun olaraq ümumi sual bankından 2 (iki) müxtəlif variantda 40 (qırx) test sualı və 3 (üç) klinik tapşırıq sualı seçir. Seçilmiş suallar yerindəcə, mətbəə üsulu ilə namizədlərin sayına uyğun olaraq çoxaldılır və onlara paylanılması üçün Komissiya tərəfindən təyin edilmiş imtahan rəhbərinə verilir.

4.13. Suallar seçildikdən sonra imtahan rəhbəri nəzarətçi və müşahidəçi ilə birlikdə cavab kartları zərfinin möhürünü açır, şəxsi eyniləşdirmə kodu ilə şifrələnmiş cavab kartları imtahan suallarının test və klinik tapşırıq hissələrinə uyğun olaraq ayrılır. Cavab kartları namizədlərə  paylanılır və onların doldurulması qaydaları izah edilir. Daha sonra sual kitabçıları paylanılır.

4.14. İmtahan üç saat müddətində keçirilir. İmtahan zamanı fasilə verilmir.

4.15. İmtahanın başlanma vaxtı suallar paylanılıb qurtardığı andan hesablanır. İmtahan bir neçə auditoriyada keçirildikdə, hər auditoriyada imtahanın başlanma vaxtı həmin auditoriyada sual kitabçaları paylanılıb qurtardığı andan hesablanır.

4.16. İmtahan suallarının test hissəsi üzrə cavab kartında düzgün cavabın yerləşdiyi hərfli dairə qara və ya tünd göy rəngdə yazan diyircəkli qələmlə doldurulmalıdır. Korlanmış cavab kartı dəyişdirilmir. Bir suala aid olan bir neçə dairə qaralanarsa, həmin cavab etibarsız sayılır və ümumi nəticəyə hesablanmır. İmtahan suallarının klinik tapşırıq hissəsi üzrə cavab kartında 3 (üç) klinik tapşırıq sualı ardıcıl olaraq tünd göy rəngdə yazan diyircəkli qələmlə aydın xətlə cavablandırılmalıdır. Cavab kartı onu doldurmuş şəxs tərəfindən imzalanır. Cavab kartında hər hansı bir qeydin aparılması qadağandır. Suallara verilən cavablardan başqa hər hansı bir qeyd aparılmış cavab kartı etibarsız hesab olunur.

4.17. İmtahanın başa çatması barədə protokol tərtib edilir. Protokol nəzarətçilər və iki namizəd tərəfindən imzalanır. Protokol və cavab kartları zərfə qoyulur, möhürlənir, imtahan rəhbərinə verilir. İmtahan rəhbəri möhürlənmiş zərfi Komissiyaya təqdim edir.

4.18. Komissiya imtahan suallarının test hissəsi üzrə cavab kartlarının yoxlanılmasını informasiya texnologiyaları tətbiq etməklə, klinik tapşırıq hissəsi üzrə cavabların qiymətləndirilməsini isə mütəxəssislər cəlb edilməklə təmin edir. Cavabların yoxlanılmasının bütün mərhələlərində imtahanda iştirak edən şəxsə dair məlumatların konfidensiallığı təmin edilməlidir.

4.19. Test hissəsi üzrə hər bir suala düzgün cavab bir balla qiymətləndirilir (cəmi 40 mümkün bal). Səhv cavablar və ya sualın cavabsız qoyulması sıfır bala bərabər tutulur.

4.20. Qiymətləndirmənin nəticələri üzrə balların hesablanması avtomatlaşdırılmış rejimdə informasiya texnologiyaları vasitəsilə həyata keçirilir.

4.21. Klinik tapşırıq hissəsi üzrə hər bir suala verilən cavab mütəxəssis tərəfindən 2, 3, 4 və ya 5 ballardan biri ilə qiymətləndirilir və sonra bütün suallar üzrə verilən ballar toplanılır (cəmi 15 mümkün bal).

4.22. Cavab kartlarının yoxlanılması başa çatdıqdan sonra imtahanının nəticələri cavab kartları ilə birlikdə Komissiyaya təqdim edilir.

4.23. Komissiya imtahanın nəticələrini imtahan keçirilən tarixdən üç gün müddətində Səhiyyə Nazirliyinin rəsmi internet səhifəsində yerləşdirir.

4.24. İmtahan suallarının test hissəsi üzrə 25 (iyirmi beş) və ya daha çox, klinik tapşırıq hissəsi üzrə isə 9 (doqquz) və ya daha çox bal toplamış şəxslər imtahandan keçmiş hesab olunurlar. İmtahan suallarının test və klinik tapşırıq hissələri üzrə toplanılan ballar ümumiləşdirilərək yekun bal çıxarılır.

4.25. İmtahanda iştirak etmiş namizədə onun tələbi ilə imtahanın nəticəsi üzrə arayış verilir.

4.26. İmtahanın nəticələrindən narazı qalan namizəd bu barədə nəticənin ona elan olunduğu vaxtdan 5 iş günü müddətində mübahisəyə aydınlıq gətirilməsi üçün Komissiyaya müraciət edə bilər. Məsələ ərizəçinin iştirakı ilə araşdırılır və ona izah verilir.

4.27. Cavab kartı düzgün qiymətləndirildikdə, ərizəçiyə Komissiya tərəfindən əsaslandırılmış cavab verilir. Balların düzgün hesablanmadığı aşkar edildikdə, Komissiya tərəfindən yenidən hesablanma aparılır.

4.28. Komissiya imtahan ilə bağlı sənədlərin (sual kitabçaları və cavab kartları) 1 (bir) il müddətində saxlanılmasını təmin edir.[18]

 

5. Müsahibə

 

5.1. Test imtahanından müvəffəqiyyətlə keçmiş namizədlər Komissiya tərəfindən xəbərdar edilir və müsahibənin keçirildiyi yer və vaxt haqqında Səhiyyə Nazirliyinin rəsmi internet səhifəsində məlumat verilir. Müsahibəyə gələnlər özləri ilə şəxsiyyət vəsiqəsini gətirməlidirlər.

5.2. Müsahibə zamanı namizədə onun Azərbaycan Respublikasının Konstitusiyası, səhiyyə qanunvericiliyinin əsasları və ixtisası sahəsində biliyinin və bacarığının müəyyən edilməsi, ümumi dünyagörüşünün (o cümlədən, özünü təqdimetmə, kollektiv tərkibində işləmək, problemi həlletmə) və kompüter biliklərinin qiymətləndirilməsi üçün müvafiq suallar verilir.

5.3.    Müsahibə başlanarkən Komissiyanın sədri namizədlərin siyahısını elan edir və müsahibədə iştirak edən şəxslərdən etirazları olub-olmamasını soruşur. Namizədlə yaxın qohumluq və ya şəxsi münasibətdə olan müsahibə aparan şəxs həmin namizədlə söhbətdə iştirak etmir. Əsaslar olduqda namizəd müsahibə başlanmazdan əvvəl müsahibə aparan şəxslərdən hər hansı birinə etiraz edə bilər. Etirazın qəbul və ya rədd edilməsini komissiyanın sədri müəyyən edir.

5.4.    Müsahibə açıq, hər bir şəxslə fərdi qaydada, 30 dəqiqəyədək müddətdə aparılır və hər namizədə beş sual verilir. Müsahibənin şəffaflıq əsasında təşkili məqsədi ilə audio-video çəkilişdən istifadə olunur.

5.5.    Namizədin verdiyi cavab Komissiyanın hər bir üzvü tərəfindən 2, 3, 4 və 5 ballardan biri ilə qiymətləndirilir və sonra Komissiya üzvlərinin verdiyi qiymətlər toplanaraq söhbətdə iştirak edən Komissiya üzvlərinin sayına bölünür.

5.6.    Müsahibənin nəticəsinə görə ən çox 25 bal toplamaq mümkündür, ən azı 16 bal toplamış namizəd müsahibə mərhələsini müvəffəqiyyətlə keçmiş hesab olunur.

5.7. Komissiya üzvləri arasında söhbətlə bağlı fikir mübadiləsi keçirilə bilər. Suallar və cavablar Komissiyanın üzvləri tərəfindən bal cədvəlinə yazılır və qiymətləndirilərək komissiyanın sədrinə təqdim edilir.

5.8. Müsahibənin nəticələri açıq elan olunur, protokollaşdırılır və komissiyanın bütün üzvləri tərəfindən imzalanır.

5.9. Test imtahanından və müsahibədən müvəffəqiyyətlə keçmiş, lakin vakant vəzifəyə təyin olunmayan namizədlər, həmin müsabiqənin nəticələri elan olunduğu tarixdən 6 (altı) ay ərzində növbəti müsabiqələr zamanı test imtahanını vermədən, müsahibə mərhələsinə buraxılırlar.[19]

 

6. Namizədlərin təyinatına dair təkliflərin verilməsi

 

6.1.    Namizədin topladığı bal onun seçdiyi 5 (beş) vakant yerə uyğun olaraq ardıcıllıqla yoxlanılır. Vakant elan edilmiş vəzifəyə təyin olunmaq üçün həmin vəzifəyə namizədlər arasında daha yüksək bal toplamış şəxs seçilir.[20]

6.2.    Eyni vakant vəzifəyə iddia edən namizədlər bərabər bal topladıqda onlar arasında üstünlük aşağıdakı meyarlar və ardıcıllıqla müəyyən edilir:

6.2.1. elmi dərəcəyə və ya ixtisas dərəcəsinə malik olma;

6.2.2. son bir il ərzində müvafiq ixtisas üzrə keçdiyi ixtisasartırma kurslarının və iştirak etdiyi konfrans, simpozium və digər tədbirlərin mövcudluğu;[21]

6.2.3. müvafiq ixtisas üzrə iş təcrübəsi;

6.2.4. xarici dili bilmək, kompüter biliyi.[22]

6.3.    Müsabiqənin nəticəsi üzrə namizədə müvafiq səhiyyə müəssisəsində işə qəbul olunmaq üçün etibarlılıq müddəti 10 iş günü olan göndəriş verilir və həmin səhiyyə müəssisəsi bu barədə göndəriş namizədə verildiyi gün məlumatlandırılır.[23]

6.4.    Namizəd göndərişi aldıqdan sonra 10 iş günü müddətində əmək müqaviləsinin bağlanması üçün səhiyyə müəssisəsinə müraciət etməlidir. Səhiyyə müəssisəsinin rəhbəri 1 iş günü ərzində həmin namizədlə əmək müqaviləsinin bağlanmasını və işə qəbulun rəsmiləşdirilməsini təmin edərək bu barədə Səhiyyə Nazirliyinə məlumat verməlidir. Əmək qabiliyyətinin müvəqqəti itirilməsi halları istisna olmaqla (bu halda əmək qabiliyyətinin müvəqqəti itirilməsi müddətinə qədər göndəriş müddəti uzadılmış hesab olunur) bu müddəti pozmuş namizədin göndərişi etibarsız hesab olunur.[24]

 

7. Müsabiqə prosesində şəffaflığın təmin edilməsi

 

7.1.       Müsabiqə prosesində beynəlxalq və qeyri-hökumət təşkilatları, kütləvi informasiya vasitələri test müsabiqələri müşahidə edə bilərlər. Müsabiqə prosesini müşahidə etmək təşəbbüsü ilə müraciət etmiş təşkilatlar və kütləvi informasiya vasitələri öz nümayəndələri barədə məlumatı test imtahanına və ya müsahibəyə ən azı 3 iş günü qalmış Komissiyaya təqdim etməlidirlər.

7.2.       Komissiyaya təqdim edilmiş məlumatlara uyğun nümayəndələrin müsabiqə prosesini müşahidə etməsi üçün şərait yaradır.

7.3. Müşahidəçilərin test müsabiqənin gedişinə müdaxiləsi yolverilməzdir.[25]

 

8. Müsabiqənin nəticələrindən şikayət verilməsi

 

8.1. Müsabiqənin yekunu üzrə Komissiyanın qərarları ilə razı olmayan namizədlər inzibati qaydada Səhiyyə Nazirliyinə və ya məhkəməyə şikayət edə bilərlər.

 

 

İSTİFADƏ OLUNMUŞ MƏNBƏ SƏNƏDLƏRİNİN SİYAHISI

 

1.       22 iyul 2014-cü il tarixli 35 nömrəli Azərbaycan Respublikası Səhiyyə Nazirliyi Kollegiyasının Qərarı (Hüquqi Aktların Dövlət Reyestrinin qeydiyyat nömrəsi 15201407220035, Hüquqi Aktların Dövlət Reyestrinə daxil edildiyi tarix 2 avqust 2014-cü il)

2.       20 may 2016-cı il tarixli 30 nömrəli Azərbaycan Respublikası Səhiyyə Nazirliyi Kollegiyasının Qərarı (Hüquqi Aktların Dövlət Reyestrinin qeydiyyat nömrəsi 15201605200030, Hüquqi Aktların Dövlət Reyestrinə daxil edildiyi tarix 2 iyun 2016-cı il)

3.       15 noyabr 2018-ci il tarixli 66 nömrəli Azərbaycan Respublikası Səhiyyə Nazirliyi Kollegiyasının Qərarı (Hüquqi Aktların Dövlət Reyestrinin qeydiyyat nömrəsi 15201811150066, Hüquqi Aktların Dövlət Reyestrinə daxil edildiyi tarix 23 noyabr 2018-ci il)

 

QƏRARA EDİLMİŞ DƏYİŞİKLİK VƏ ƏLAVƏLƏRİN SİYAHISI