Aktın növü	AZƏRBAYCAN RESPUBLİKASININ ƏDLİYYƏ NAZİRLİYİ KOLLEGİYASININ QƏRARI
Qəbul edildiyi tarix	30.08.2012
Qeydiyyat nömrəsi	16-N
Adı	“Şərti məhkum olunmuş və cəzadan şərti olaraq vaxtından əvvəl azad edilmiş şəxslər üzərində nəzarətin həyata keçirilməsi qaydaları haqqında Təlimat”ın təsdiq edilməsi barədə[1]
Rəsmi dərc edildiyi mənbə
Qüvvəyə minmə tarixi	31.08.2012
Azərbaycan Respublikasının Vahid hüquqi təsnifatı üzrə indeks kodu	390.010.030
Hüquqi Aktların Dövlət Reyestrinin qeydiyyat nömrəsi	15201208300016
Hüquqi aktın Hüquqi Aktların Dövlət Reyestrinə daxil edildiyi tarix	30.08.2012

 

“Hərbi vəzifə və hərbi xidmət haqqında” Azərbaycan Respublikası Qanununun tətbiqi barədə” Azərbaycan Respublikası Prezidentinin 2012-ci il 13 fevral tarixli 593 nömrəli Fərmanının 6-cı hissəsinin icrasını təmin etmək məqsədi ilə, habelə “Normativ hüquqi aktlar haqqında” Azərbaycan Respublikasının Konstitusiya Qanununun tətbiq edilməsi barədə” Azərbaycan Respublikası Prezidentinin 2011-ci il 16 fevral tarixli 384 nömrəli Fərmanına uyğun olaraq “Azərbaycan Respublikasının Ədliyyə Nazirliyi haqqında Əsasnamə”nin 19-cu bəndini rəhbər tutaraq Kollegiya

 

QƏRARA ALIR:

 

1. “Şərti məhkum olunmuş və cəzadan şərti olaraq vaxtından əvvəl azad edilmiş şəxslər üzərində nəzarətin həyata keçirilməsi qaydaları haqqında Təlimat” yeni redaksiyada təsdiq edilsin (əlavə olunur).

2. Bu Təlimatın Azərbaycan Respublikasının Hüquqi Aktların Dövlət Reyestrinə daxil edilməsi təmin olunsun (A.Əliyev).

3. Ədliyyə Nazirliyi üzrə 2010-cu il 20 dekabr tarixli 21‑T nömrəli əmrin 2.1-ci bəndi ləğv edilsin.

4. Qərar aidiyyəti ədliyyə orqanlarına göndərilsin.

 

 

 

 

 

Şərti məhkum olunmuş və cəzadan şərti olaraq vaxtından əvvəl azad edilmiş şəxslər üzərində nəzarətin həyata keçirilməsi qaydaları haqqında

Təlimat

 

1. Ümumi müddəalar

 

1.1. Bu Təlimat Azərbaycan Respublikasının Cəzaların İcrası və Cinayət məcəllələrinə, habelə digər qanunvericilik aktlarına uyğun olaraq hazırlanmış və şərti məhkum olunmuş və cəzadan şərti olaraq vaxtından əvvəl azad edilmiş şəxslərin qeydiyyatının aparılması, onların ictimai qaydalara riayət etməsinə və məhkəmə tərəfindən onlara həvalə olunmuş vəzifələrin yerinə yetirilməsinə nəzarətin təşkili qaydalarını müəyyən edir.

1.2. Şərti məhkum olunmuş və cəzadan şərti olaraq vaxtından əvvəl azad edilmiş şəxslər üzərində (hərbi qulluqçular istisna olmaqla) nəzarəti sınaq müddəti və cəzanın çəkilməmiş hissəsi ərzində məhkumun yaşayış yeri üzrə icra məmurları həyata keçirir.

 

2. Şərti məhkum olunmuş və cəzadan şərti olaraq vaxtından əvvəl azad edilmiş şəxslər barəsində məhkəmənin hökm və ya digər yekun qərarını icraya qəbul edilməsi, icrası və nəzarətin təşkili qaydaları

 

2.1. Şərti məhkum olunmuş və cəzadan şərti olaraq vaxtından əvvəl azad edilmiş şəxslərin qeydiyyata götürülməsi üçün əsas məhkəmənin hökm və ya digər yekun qərarı, habelə hakimin göstərişi və ya cəzaçəkmə müəssisəsinin göndərişidir.

2.2. Cəzaçəkmə müəssisəsinin müdiriyyəti cəzadan şərti olaraq vaxtından əvvəl azad etmə haqqında məhkəmə qərarının surətini, habelə məhkumun azad edildiyi vaxtdan sonra on beş gün müddətində yaşayış yeri üzrə icra qurumuna qeydiyyata götürülməsi ilə əlaqədar müraciət etməsi haqqında iltizamının surətini üç gündən gec olmayaraq onun yaşayış yeri üzrə məhkəməyə və icra qurumuna göndərir.

2.3. Sınaq müddəti məhkəmənin hökm və ya digər yekun qərarının qanuni qüvvəyə mindiyi gündən hesablanır.

2.4. İcra məmuru daxil olmuş sənədləri qəbul etdikdən dərhal sonra vərəqləri nömrələnərək tikilmiş və Azərbaycan Respublikası Ədliyyə Nazirliyinin (Naxçıvan Muxtar Respublikasının ərazisində - Muxtar Respublikanın Ədliyyə Nazirliyinin) möhürü ilə təsdiqlənmiş şərti məhkum olunmuş və cəzadan şərti olaraq vaxtından əvvəl azad edilmiş şəxslərin qeydiyyatı kitabında məhkumların qeydiyyatını aparır (Əlavə 1 və 2).

2.5. İcra məmuru şərti məhkum olunmuş və cəzadan şərti olaraq vaxtından əvvəl azad edilmiş şəxs barəsində məhkəmənin hökm və ya digər yekun qərarının surətinə, hakimin göstərişinə və ya cəzaçəkmə müəssisəsinin göndərişinə və əlavə olunmuş digər sənədlərə əsasən nəzarət işi açır (Əlavə 3 və 4). Nəzarət işində olan bütün sənədlər ardıcıllıqla tikilir və səhifələnir. Nəzarət işinin üz qabığının içəri hissəsində orada olan bütün sənədlərin siyahısı tərtib edilir.

Nəzarət işinin nömrəsi şərti məhkum olunmuş və cəzadan şərti olaraq vaxtından əvvəl azad edilmiş şəxslərin qeydiyyat kitabındakı sıra nömrəsi ilə eyni olmalıdır.

Nəzarət işinə buraxılış yalnız onunla birbaşa işləyən və ya digər səlahiyyətli şəxslərlə məhdudlaşır.

2.6. İcra məmuru şərti məhkum olunmuş və cəzadan şərti olaraq vaxtından əvvəl azad edilmiş şəxsi qeydiyyata götürdükdən sonra onunla söhbət aparır, onun üzərinə məhkəmənin hökm və ya digər yekun qərarı ilə qoyulmuş vəzifələri nəzərinə çatdırır, ona məsuliyyətini, vəzifə və hüquqlarını izah edir və bu barədə arayış tərtib edir (Əlavə 5).

2.7. İcra məmuru şərti məhkum olunmuş və cəzadan şərti olaraq vaxtından əvvəl azad edilmiş şəxs barəsində məhkəmənin hökm və ya digər yekun qərarını və əlavə olunmuş digər sənədləri icraata qəbul etdikdən dərhal sonra bu barədə hökmü və ya digər yekun qərarı çıxarmış məhkəməyə məlumat verir.

2.8. İcra məmuru şərti məhkum olunmuş və cəzadan şərti olaraq vaxtından əvvəl azad edilmiş şəxs barəsində məhkumun yaşayış yeri üzrə polis orqanına bildiriş göndərir və məhkumun yaşayış yerini dəyişməsi və ya yaşayış yeri üzrə qeydiyyatdan çıxmaq üçün müraciət etməsi, habelə onun ictimai qaydaları pozması  və ya cinayət törətməsi barədə dərhal məlumat verilməsini xahiş edir (Əlavə 6).

2.9. İcra məmuru şərti məhkum olunmuş və cəzadan şərti olaraq vaxtından əvvəl azad edilmiş şəxs üzərində nəzarəti təmin etmək məqsədi ilə onun iş (təhsil) yerinə bildiriş göndərir, məhkum tərəfindən ictimai qaydanın pozulması və məhkəmə tərəfindən onun üzərinə qoyulmuş vəzifələrin yerinə yetirilməməsi və iş (təhsil) yerinin dəyişdirməsi hallarında dərhal ona məlumat verilməsini xahiş edir (Əlavə 7).

2.10. İcra məmuru şərti məhkum olunmuş və cəzadan şərti olaraq vaxtından əvvəl azad edilmiş hərbi vəzifəlilər və çağırışçılar barəsində qanuni qüvvəyə minmiş məhkəmə hökmünə dair məlumatı onların qeydiyyatda olduğu Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin yerli idarəsinə (şöbə və ya bölmə) 7 (yeddi) gün müddətində verməlidir.

 

3. Şərti məhkum olunmuş və cəzadan şərti olaraq vaxtından əvvəl azad edilmiş şəxslər üzərində nəzarəti həyata keçirən icra məmurlarının vəzifələri

 

3.1. Şərti məhkum olunmuş və cəzadan şərti olaraq vaxtından əvvəl azad edilmiş şəxslər üzərində nəzarəti həyata keçirən icra məmuru aşağıdakı vəzifələri daşıyır:

3.1.1. Şərti məhkum olunmuş və cəzadan şərti olaraq vaxtından əvvəl azad edilmiş şəxsin davranışını, məhkəmə tərəfindən onun üzərinə qoyulmuş vəzifələrə və ictimai qaydalara əməl etməsini öyrənmək məqsədi ilə vaxtaşırı onun iş (təhsil) yerinə sorğu etmək;

3.1.2. Şərti məhkum olunmuş və cəzadan şərti olaraq vaxtından əvvəl azad edilmiş şəxsin qanun pozuntusuna yol verib-verməməsini və məhkəmə tərəfindən üzərinə qoyulmuş vəzifələrə əməl etməsini öyrənmək məqsədi ilə vaxtaşırı onun yaşayış yeri üzrə polis orqanına sorğu etmək;

3.1.3. Vaxtaşırı şərti məhkum olunmuş və cəzadan şərti olaraq vaxtından əvvəl azad edilmiş şəxslərlə görüşüb söhbətlər aparmaq;

3.1.4. Şərti məhkum olunmuş və cəzadan şərti olaraq vaxtından əvvəl azad edilmiş şəxslərin ərizə və şikayətlərini qəbul etmək, onlara vaxtında cavab vermək;

3.1.5. Məhkum yaşayış yerini dəyişdikdə və ya yaşayış yeri üzrə qeydiyyatdan çıxaraq başqa yerə getdikdə, icra məmuru həmin rayonun icra qurumuna bu barədə məlumat verir və məhkum edilmiş şəxs barəsində məhkəmənin hökm və ya digər yekun qərarını, habelə nəzarət işində olan digər sənədləri ərazi aidiyyəti üzrə göndərir.

3.2. Məhkuma müəyyən vəzifə tutma və ya müəyyən fəaliyyətlə məşğul olma hüququndan məhrum etmə növündə cəza əlavə cəza kimi təyin edildikdə, məhkumun yaşadığı yerin icra məmuru:

3.2.1. Müəyyən vəzifə tutma və ya müəyyən fəaliyyətlə məşğul olma hüququndan məhrum etmə barədə məhkəmə hökmünün tələblərinə məhkumun riayət etməsinə nəzarət edir;

3.2.2. Müəyyən vəzifə tutma və ya müəyyən fəaliyyətlə məşğul olma hüququndan məhrum etmə barədə məhkəmənin hökmündə nəzərdə tutulan tələblərin işəgötürən tərəfindən yerinə yetirilməsini yoxlayır.

3.3. Şərti məhkum olunma və cəzadan şərti olaraq vaxtından əvvəl azad etmə zamanı əlavə cəza kimi cərimə növündə cəzanın icrası məhkumun yaşadığı və ya işlədiyi yerin, yaxud onun əmlakının olduğu yerin icra məmuru tərəfindən həyata keçirilir. Şərti məhkum etmə zamanı əlavə cəza kimi əmlak müsadirəsi növündə cəzanın icrasını isə əmlakın olduğu yer üzrə icra məmuru həyata keçirir və bu barədə əsas cəzanı icra edən icra məmuruna məlumat verir.

3.4. Məhkuma nəqliyyat vasitəsini idarəetmə hüququndan məhrum etmə növündə cəza əlavə cəza kimi təyin edildikdə, məhkum olunmuş şəxsin yaşadığı yerin icra məmuru:

3.4.1. Məhkumun məhkəmənin hökmündə göstərilən tələblərə riayət etməsinə nəzarət edir;

3.4.2. Hökmdə göstərilən tələblərin məhkumun işlədiyi yerin işəgötürəni tərəfindən yerinə yetirilməsini yoxlayır.

3.5. Hərbi hissənin komandiri sınaq müddəti başa çatmamış şərti məhkum olunmuş şəxsin müddətli həqiqi hərbi xidmətdən ehtiyata buraxılması ilə əlaqədar onun barəsində çıxarılmış məhkəmənin hökm və ya digər yekun qərarını, habelə nəzarət işində olan digər sənədləri daimi yaşayış üçün getdiyi yerin icra qurumuna göndərdikdə, qurum tərəfindən həmin şəxs üzərində nəzarət həyata keçirilir.

3.6. Şərti məhkum edilmiş şəxs məhkəmə tərəfindən onun üzərinə qoyulmuş vəzifələrin yerinə yetirilməsindən boyun qaçırdıqda və ya ictimai qaydaları pozduğuna görə barəsində inzibati tənbeh tətbiq edildikdə, icra məmuru sınaq müddətinin uzadılması haqqında məhkəməyə təqdimat verir (Əlavə 8).

3.7. Şərti məhkum olunmuş şəxs sınaq müddətində məhkəmə tərəfindən onun üzərinə qoyulmuş vəzifələrin yerinə yetirilməsindən mütəmadi və ya qərəzli olaraq boyun qaçırdıqda, icra məmuru şərti məhkum etmənin ləğv edilməsi və hökmlə təyin olunmuş cəzanın icra olunması barədə məhkəməyə təqdimat verir (Əlavə 9).

3.8. Cəzadan şərti olaraq vaxtından əvvəl azad edilmiş şəxs məhkəmə tərəfindən onun üzərinə qoyulmuş vəzifələrin yerinə yetirilməsindən mütəmadi, yaxud qərəzli olaraq boyun qaçırdıqda və ya ictimai qaydaları pozduğuna görə barəsində inzibati tənbeh tətbiq edildikdə, icra məmuru şərti olaraq vaxtından əvvəl azad etmənin ləğv edilməsi və cəzanın çəkilməmiş hissəsinin icra olunması haqqında məhkəməyə təqdimat verir (Əlavə 10).

3.9. İcra məmuru şərti məhkum olunmuş şəxsin üzərinə onun islah olunmasına kömək edən yeni vəzifələrin qoyulması və ya məhkumun üzərinə əvvəllər qoyulmuş vəzifələrin tamamilə və ya qismən ləğv edilməsi barədə məhkəməyə təqdimat verir (Əlavə 11).

3.10. Sınaq müddətinin azı yarısı keçdikdən sonra şərti məhkum olunmuş şəxs öz davranışı ilə islah olunduğunu sübut edərsə, icra məmuru şərti məhkum etmənin ləğv edilməsi və məhkumluğun götürülməsi barədə məhkəməyə onun razılığına əsasən təqdimat verir (Əlavə 12).

Məhkum barəsində xasiyyətnamə və digər sənədlər də təqdimata əlavə edilərək baxılması üçün məhkəməyə göndərilir.

 

4. Şərti məhkum olunmuş və cəzadan şərti olaraq vaxtından əvvəl azad edilmiş şəxsin yerini müəyyən etmək mümkün olmadıqda, icra məmurunun hərəkətləri

 

4.1. Şərti məhkum olunmuş və cəzadan şərti olaraq vaxtından əvvəl azad edilmiş şəxsin olduğu yer məlum olmadıqda, icra məmuru aşağıdakı tədbirləri həyata keçirir:

4.1.1. Məhkumun yaxın qohum və tanışlarına şifahi sorğu edir;

4.1.2. Yaşayış yerinin qeydiyyat orqanına şərti məhkum olunmuş və cəzadan şərti olaraq vaxtından əvvəl azad edilmiş şəxsin qeydiyyatdan çıxıb-çıxmaması barədə sorğu edir;

4.1.3. Məhkumun yaşayış yeri üzrə rayon (şəhər) icra hakimiyyəti orqanının yerli nümayəndəliyinə (mənzil istismar sahəsinə) onun həmin ərazidə faktiki olaraq yaşayıb-yaşamaması barədə sorğu edir;

4.1.4. Şərti məhkum olunmuş və cəzadan şərti olaraq vaxtından əvvəl azad edilmiş şəxs yaşadığı ərazinin qeydiyyatından çıxaraq getmişsə, müvafiq orqana sorğu edir;

4.1.5. Məhkum işləyirsə, onun iş yerinə sorğu edir;

4.1.6. Hərbi qeydiyyatdan çıxıb-çıxmaması barədə onun yaşayış yeri üzrə Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin yerli idarəsinə (şöbə və ya bölmə) sorğu edir;

4.1.7. Məhkumun yaşayış yeri üzrə səhiyyə orqanlarına sorğu edir;

4.1.8. Şərti məhkum olunmuş və cəzadan şərti olaraq vaxtından əvvəl azad edilmiş şəxsin yaşayış yeri üzrə polis orqanlarına sorğu edir.

4.2. İcra məmuru şərti məhkum olunmuş və cəzadan şərti olaraq vaxtından əvvəl azad edilmiş şəxsin olduğu yeri bir ay müddətində müəyyən edə bilməzsə, onun barəsində qanunvericilikdə nəzərdə tutulmuş tədbirlərin görülməsi məqsədi ilə məhkəməyə təqdimatla müraciət edir (Əlavə 13).

Təqdimata şərti məhkum olunmuş və cəzadan şərti olaraq vaxtından əvvəl azad edilmiş şəxs barəsində məhkəmənin hökm və ya digər yekun qərarının surəti və ilkin axtarış tədbirləri haqqında bütün materiallar əlavə edilir.

 

5. Şərti məhkum olunmuş və cəzadan şərti olaraq vaxtından əvvəl azad edilmiş şəxslər üzərində nəzarətin dayandırılması və onun qeydiyyatdan çıxarılması

 

5.1. İcra məmuru aşağıdakı əsaslar olduqda, şərti məhkum olunmuş və cəzadan şərti olaraq vaxtından əvvəl azad edilmiş şəxslər üzərində nəzarəti dayandırır və onları qeydiyyatdan çıxarır:

5.1.1. Şərti məhkum olunmuş şəxs barəsində təyin edilmiş sınaq müddəti, cəzadan şərti olaraq vaxtından əvvəl azad edilmiş şəxsin cəzasının çəkilməmiş hissəsi başa çatdıqda;

5.1.2. Məhkum vəfat etdikdə;

5.1.3. Şərti məhkum olunma və cəzadan şərti olaraq vaxtından əvvəl azad etmə ləğv edildikdə və məhkum ona məhkəmənin hökm və ya digər yekun qərarı ilə təyin olunmuş cəzanı çəkməyə göndərildikdə;

5.1.4. Məhkum bəraət aldıqda;

5.1.5. Şərti məhkum olunmuş və cəzadan şərti olaraq vaxtından əvvəl azad edilmiş şəxsə amnistiya aktı tətbiq edildikdə;

5.1.6. Məhkum əfv edildikdə;

5.1.7. Şərti məhkum olunmuş və cəzadan şərti olaraq vaxtından əvvəl azad edilmiş şəxs tərəfindən yeni cinayət törədilməsi ilə əlaqədar həbs edildikdə;

5.1.8. Məhkum yaşayış yerini dəyişdikdə;

5.1.9. Şərti məhkum olunmuş və cəzadan şərti olaraq vaxtından əvvəl azad edilmiş şəxs müddətli həqiqi hərbi xidmətə çağırıldıqda;

5.1.10. Sınaq müddətinin azı yarısı keçdikdən sonra məhkumun üzərində nəzarəti həyata keçirən icra məmurunun təqdimatı əsasında şərti məhkum etmənin ləğv edilməsi və məhkumluğun götürülməsi barədə məhkəmə qərar qəbul etdikdə.

5.2. Aşağıdakı sənədlər şərti məhkum olunmuş və cəzadan şərti olaraq vaxtından əvvəl azad edilmiş şəxsi qeydiyyatdan çıxarmağa əsas verir:

5.2.1. Şərti məhkum olunmuş və cəzadan şərti olaraq vaxtından əvvəl azad edilmiş şəxs vəfat etdikdə - qeydiyyat orqanın bu barədə arayışı;

5.2.2. Amnistiya aktının tətbiq edilməsi barədə qərar;

5.2.3. Əfvetmə barədə fərman;

5.2.4. Şərti məhkum olunma və cəzadan şərti olaraq vaxtından əvvəl azad etmə ləğv edilərək, məhkumun məhkəmə hökmü ilə ona təyin edilmiş cəzanı çəkməyə göndərilməsi barədə məhkəmənin hökm və ya digər yekun qərarının surətini;

5.2.5. Şərti məhkum olunmuş və cəzadan şərti olaraq vaxtından əvvəl azad edilmiş şəxs sınaq müddəti və cəzanın çəkilməmiş hissəsi ərzində yeni cinayət törətdikdə, məhkəmənin hökm və ya digər yekun qərarının surəti və hakimin göstərişi;

5.2.6. Məhkum yaşayış yerini dəyişdikdə və yaşayış yeri üzrə qeydiyyatdan çıxaraq başqa yerə getdikdə - həmin yer üzrə icra məmurunun şərti məhkum olunmuş və cəzadan şərti olaraq vaxtından əvvəl azad edilmiş şəxs barəsində məhkəmənin hökm və ya digər yekun qərarını, habelə nəzarət işində olan digər sənədləri alması barədə məlumatı;

5.2.7. Məhkəmənin bəraət hökmü.

5.2.8. Şərti məhkum etmənin ləğv olunması və məhkumluğun götürülməsi barədə məhkəmə qərarı.

5.3. Məhkum qeydiyyatdan çıxarıldıqda, şərti məhkum olunmuş və cəzadan şərti olaraq vaxtından əvvəl azad edilmiş şəxslərin qeydiyyat kitabında müvafiq qeyd aparılır və bu barədə məhkəməyə məlumat verilir.

 

 

 

 

 

 

 

 

 

 

 

 

 

 

 

 

BİLDİRİŞ

 

 

 

 

 

 

 

 

 

 

 

 

İSTİFADƏ OLUNMUŞ MƏNBƏ SƏNƏDLƏRİNİN SİYAHISI

 

1.       24 aprel 2018-ci il tarixli 14-N nömrəli Azərbaycan Respublikası Ədliyyə Nazirliyi Kollegiyasının Qərarı (Hüquqi Aktların Dövlət Reyestrinin qeydiyyat nömrəsi 15201804240014, Hüquqi Aktların Dövlət Reyestrinə daxil edildiyi tarix 24 aprel 2018-ci il)

 

QƏRARA EDİLMİŞ DƏYİŞİKLİK VƏ ƏLAVƏLƏRİN SİYAHISI