Ezamiyyə xərclərinin normaları haqqında

Ezamiyyə xərclərinin normaları haqqında

AZƏRBAYCAN RESPUBLİKASI NAZİRLƏR KABİNETİNİN QƏRARI

Dövlət büdcəsi xərclərinin proqnozlaşdırılmasında istifadə olunan ezamiyyə xərclərinin normalarını təkmilləşdirmək məqsədi ilə Azərbaycan Respublikasının Nazirlər Kabineti qərara alır:

1. Azərbaycan Respublikasının ərazisində ezamiyyə xərclərinin 1 günlük norması Bakı şəhərində 90,0 manat, Gəncə, Sumqayıt və Naxçıvan şəhərlərində 70,0 manat, respublika tabeli digər şəhərlərdə, rayon mərkəzlərində, şəhər tipli qəsəbələrdə və kəndlərdə 65,0 manat müəyyən edilsin.[1]

Azərbaycan Respublikasının ərazisində ezamiyyə xərclərinin müəyyən edilmiş 1 günlük normasının 80 faizini mehmanxana xərcləri təşkil edir.[2]

1-1. Müəyyən edilsin ki, Azərbaycan Respublikasının ərazisində ezamiyyə zamanı mehmanxana xərcləri barədə müvafiq təsdiqedici sənədlər təqdim edilmədiyi hallarda, ezamiyyə xərclərinin 1 günlük normasının mehmanxana xərcləri üçün müəyyən edilmiş hissəsinin 50 faizi ödənilir.[3]

2. “Xarici ölkələrə ezamiyyə xərclərinin 1 günlük normaları” təsdiq edilsin (1 nömrəli əlavə).

3. “Rəhbər işçilərin xarici ölkələrə ezamiyyətləri ilə əlaqədar ezamiyyə xərclərinin 1 günlük normasına əlavələr və həmin əlavələrin tətbiq olunduğu rəhbər işçilərin kateqoriyası” təsdiq edilsin (2 nömrəli əlavə).[4]

4. Müəyyən edilsin ki, ezamiyyə xərclərinin 1 günlük normasına gündəlik, mehmanxana, rabitə, şəhərdaxili nəqliyyat (taksidən istifadə istisna olmaqla) və digər xidmətlər ilə bağlı xərclər daxildir.

5. Nəqliyyat xərcləri (ezam olunma yerinə getmək və qayıtmaq, ölkə-daxili xərclər) təqdim edilən sənədlər əsasında ödənilir.

6. Daimi iş vaxtı yolda keçən və gediş-gəliş xarakteri daşıyan, növbə (vaxta) metodu ilə işləyən və çöl şəraitində çalışan (gündəlik iş vaxtı başa çatdıqdan sonra öz daimi yaşayış yerinə qayıtmaq imkanı olmayan) müəssisə, idarə və təşkilatların işçilərinə ezamiyyə xərcləri əvəzinə hər gün üçün 15,0 manat əlavə vəsait verilir.[5]

7. Müəyyən edilsin ki:

büdcədən maliyyələşdirilən müəssisə, idarə və təşkilatlarda ezamiyyə xərcləri onlara bu məqsəd üçün büdcədə nəzərdə tutulan vəsaitlər dairəsində, digər təşkilatlarda isə onların öz vəsaitləri hesabına ödənilir;

büdcədən maliyyələşdirilən müəssisə, idarə və təşkilatlar istisna olmaqla digər təşkilatlar ezamiyyə xərclərinin ödənilməsi üçün öz sərəncamlarında qalan mənfəət hesabına bu qərarla müəyyən edilmiş normalardan əlavə vəsait ayıra bilərlər;

büdcədən maliyyələşdirilən dövlət orqanlarında işin xüsusiyyətləri ilə əlaqədar olaraq, Azərbaycan Respublikasının ərazisi daxilində xidməti minik avtomobilləri ilə xidməti ezamiyyətə gedilməsi zəruri olan hallarda avtomobil nəqliyyatı vasitələri üçün müəyyən edilmiş aylıq yürüş həddindən artıq yol qət edildiyi təqdirdə, sərf edilən yanacağın dəyəri təsdiqedici sənədlər əsasında ezamiyyə xərcləri üçün nəzərdə tutulmuş vəsaitlər hesabına nəqliyyat xərci kimi ödənilir.

7-1. Azərbaycan Respublikasının mərkəzi və yerli icra hakimiyyəti orqanlarının, dövlət mülkiyyətində olan və ya paylarının (səhmlərinin) nəzarət zərfi dövlətə məxsus olan hüquqi şəxslərin, digər dövlət orqanlarının rəhbərlərinə tapşırılsın ki, ezamiyyələrin həyata keçirilməsini dövlət büdcəsi xərclərinin səmərəliliyinin artırılması və maliyyə vəsaitinin qənaətlə istifadə edilməsinin vacibliyi nəzərə alınmaqla təmin etsinlər.[6]

8. Azərbaycan Respublikasının Maliyyə Nazirliyinə və Azərbaycan Respublikasının Əmək və Əhalinin Sosial Müdafiəsi Nazirliyinə tapşırılsın ki, 1 ay müddətində “İşçilərin ezamiyyə qaydaları”nı hazırlayıb müvafiq qaydada təsdiq etsinlər.

9. “Azərbaycan Respublikası Nazirlər Kabinetinin qüvvədən düşmüş bəzi qərarlarının Siyahısı” təsdiq edilsin (əlavə olunur).

10. Bu qərar 2008-ci il martın 1-dən qüvvəyə minir.

Azərbaycan Respublikasının Baş naziri A.RASİZADƏ

Bakı şəhəri 25 yanvar 2008-ci il

№ 14

Azərbaycan Respublikası Nazirlər Kabinetinin

2008-ci il 25 yanvar tarixli 14 nömrəli qərarı ilə

TƏSDİQ EDİLMİŞDİR

1 nömrəli Əlavə

Xarici ölkələrə ezamiyyə xərclərinin 1 günlük normaları

Sıra №-si	Ölkənin adı	Valyutaların adı	Ezamiyyə xərclərinin 1 günlük norması
1.	2.	3.	4.
1.	Rusiya Federasiyası	ABŞ dolları	150
1.	Moskva və Sankt-Peterburq şəhərləri	ABŞ dolları	240
2.	Tacikistan	ABŞ dolları	140
2.	Düşənbə şəhəri	ABŞ dolları	160
3.	Özbəkistan	ABŞ dolları	100
3.	Daşkənd şəhəri	ABŞ dolları	160
4.	Belarus	ABŞ dolları	140
4.	Minsk şəhəri	ABŞ dolları	180
5.	Ukrayna	ABŞ dolları	160
5.	Kiyev şəhəri	ABŞ dolları	210
6.	Moldova	ABŞ dolları	110
6.	Kişineu şəhəri	ABŞ dolları	150
7.	Qazaxıstan	ABŞ dolları	130
7.	Almatı və Astana şəhərləri	ABŞ dolları	200
8.	Qırğızıstan	ABŞ dolları	130
8.	Bişkek şəhəri	ABŞ dolları	160
9.	Gürcüstan	ABŞ dolları	140
9.	Tbilisi şəhəri	ABŞ dolları	155
10.	Türkmənistan	ABŞ dolları	95
10.	Aşqabad şəhəri	ABŞ dolları	130
11.	Latviya	avro	105
11.	Riqa şəhəri	avro	140
12.	Litva	avro	120
12.	Vilnüs şəhəri	avro	145
13.	Estoniya	avro	95
13.	Tallin şəhəri	avro	140
14.	Böyük Britaniya	İngiltərə funt sterlinqi	170
14.	London şəhəri	İngiltərə funt sterlinqi	190
15.	Lixtenşteyn	avro	200
16.	Avstriya	avro	185
17.	Almaniya	avro	225
18.	Belçika	avro	215
19.	İrlandiya	avro	215
20.	Monako	avro	195
21.	Norveç	avro	225
22.	Niderland	avro	225
23.	San-Marino	avro	215
24.	Fransa	avro	205
24.	Paris şəhəri	avro	250
25.	Türkiyə	avro	150
25.	Ankara və İstanbul şəhərləri	avro	165
26.	İtaliya	avro	185
27.	Xorvatiya	avro	185
28.	Bosniya və Herseqovina	avro	160
29.	Danimarka	avro	180
30.	İsveçrə	avro	210
31.	Lüksemburq	avro	190
32.	Makedoniya	avro	190
33.	Kipr	avro	160
34.	Macarıstan	avro	160
35.	Malta	avro	160
36.	Portuqaliya	avro	170
37.	Slovakiya	avro	160
38.	Finlandiya	avro	210
39.	Çexiya	avro	190
40.	Serbiya	avro	155
41.[7]	Monteneqro	avro	155
42.	Andorra	avro	200
43.	Albaniya	avro	160
44.	Yunanıstan	avro	180
45.	İslandiya	avro	190
46.	İspaniya	avro	200
47.	Polşa	avro	175
48.	İsveç	avro	225
49.	Bolqarıstan	avro	135
50.	Rumıniya	avro	175
51.	Sloveniya	avro	145
52.	ABŞ	ABŞ dolları	330
52.	Nyu-York şəhəri	ABŞ dolları	350
53.	Argentina	ABŞ dolları	195
54.	Braziliya	ABŞ dolları	225
55.	Kanada	ABŞ dolları	190
56.	Meksika	ABŞ dolları	165
57.	Amerika qitəsi üzrə digər ölkələr	ABŞ dolları	165
58.	Bəhreyn	ABŞ dolları	165
59.	Səudiyyə Ərəbistanı	ABŞ dolları	165
60.	Birləşmiş Ərəb Əmirlikləri	ABŞ dolları	235
61.	İordaniya	ABŞ dolları	140
62.	İran	ABŞ dolları	160
63.	Qətər	ABŞ dolları	180
64.	Küveyt	ABŞ dolları	180
65.	Oman	ABŞ dolları	170
66.	Suriya	ABŞ dolları	160
67.	İraq	ABŞ dolları	160
68.	İsrail	ABŞ dolları	170
68-1.[8]	Fələstin	ABŞ dolları	170
69.	Livan	ABŞ dolları	170
70.	Liviya	ABŞ dolları	170
71.	Bruney	ABŞ dolları	155
72.	Yəmən	ABŞ dolları	185
73.	Əlcəzair	ABŞ dolları	165
74.	Mərakeş	ABŞ dolları	180
75.	Misir	ABŞ dolları	180
76.	Tunis	ABŞ dolları	180
77.	Seneqal	ABŞ dolları	185
78.	Sudan	ABŞ dolları	165
79.	Cibuti	ABŞ dolları	155
80.	Çad	ABŞ dolları	225
81.	Cənubi Afrika Respublikası	ABŞ dolları	240
82.	Afrika qitəsi üzrə digər ölkələr	ABŞ dolları	155
83.	Çin Xalq Respublikası	ABŞ dolları	185
84.	Sinqapur	ABŞ dolları	235
85.	Tailand	ABŞ dolları	205
86.	Malayziya	ABŞ dolları	205
87.	Şri-Lanka	ABŞ dolları	155
88.	Hindistan	ABŞ dolları	155
89.	Nepal	ABŞ dolları	155
90.	Banqladeş	ABŞ dolları	155
91.	Pakistan	ABŞ dolları	165
92. [9]	Butan	ABŞ dolları	145
92-1[10]	Myanma	ABŞ dolları	155
93.	Monqolustan	ABŞ dolları	145
94.	Laos	ABŞ dolları	155
95.	Vyetnam	ABŞ dolları	155
96.	İndoneziya	ABŞ dolları	205
97.	Əfqanıstan	ABŞ dolları	175
98.	Kamboca	ABŞ dolları	175
99.	Mavritaniya	ABŞ dolları	175
100.	Mali	ABŞ dolları	195
101.	Maldiv adaları	ABŞ dolları	165
102.	Hibraltar	avro	150
103.	Koreya Xalq Demokratik Respublikası (KXDR)	ABŞ dolları	225
104.	Koreya Respublikası	ABŞ dolları	245
105.	Yaponiya	Yapon iyeni	34720
106.	Filippin	ABŞ dolları	210
107.	Yeni Zelandiya	ABŞ dolları	195
108.	Avstraliya və Okeaniya	ABŞ dolları	195

Azərbaycan Respublikası Nazirlər Kabinetinin

2008-ci il 25 yanvar tarixli 14 nömrəli qərarı ilə

TƏSDİQ EDİLMİŞDİR

2 nömrəli Əlavə

Rəhbər işçilərin xarici ölkələrə ezamiyyətləri ilə əlaqədar ezamiyyə xərclərinin 1 günlük normasına əlavələr və həmin əlavələrin tətbiq olunduğu rəhbər işçilərin kateqoriyası[11]

Sıra №-si	Rəhbər işçinin vəzifəsi	Əlavə (faizlə)
1	2	3
1.	Azərbaycan Respublikasının Baş naziri, Azərbaycan Respublikası Milli Məclisinin, Azərbaycan Respublikası Konstitusiya Məhkəməsinin, Azərbaycan Respublikası Ali Məhkəməsinin sədrləri[12]	100
2.	Azərbaycan Respublikası Baş nazirinin müavinləri, Azərbaycan Respublikasının Milli Məclisi, Azərbaycan Respublikasının Konstitusiya Məhkəməsi, Azərbaycan Respublikasının Ali Məhkəməsi sədrinin müavinləri; Azərbaycan Respublikası Milli Məclisinin, Azərbaycan Respublikası Konstitusiya Məhkəməsinin, Azərbaycan Respublikası Ali Məhkəməsinin, Azərbaycan Respublikası Nazirlər Kabinetinin Aparat rəhbərləri; ~~Azərbaycan Respublikası Ali Məhkəməsinin,~~ Azərbaycan Respublikası Hesablama Palatasının, Məhkəmə-Hüquq Şurasının, Azərbaycan Respublikası Mərkəzi Seçki Komissiyasının, Azərbaycan Respublikası Milli Televiziya və Radio Şurasının sədrləri, Azərbaycan Milli Elmlər Akademiyasının prezidenti, Azərbaycan Respublikasının İnsan Hüquqları üzrə müvəkkili (ombudsman), Azərbaycan Respublikasının Baş prokuroru, Azərbaycan Respublikası apellyasiya məhkəmələrinin sədrləri, Azərbaycan Respublikası Milli Məclisinin deputatları, Azərbaycan Respublikası mərkəzi icra hakimiyyəti orqanlarının rəhbərləri, Azərbaycan Respublikası Hesablama Palatasının sədrinin müavinləri, Azərbaycan Respublikası Hesablama Palatasının auditorları, Bakı Şəhər İcra Hakimiyyəti başçısı[13]	50
3.	Azərbaycan Respublikası Konstitusiya Məhkəməsinin, Azərbaycan Respublikası Ali Məhkəməsinin hakimləri; ~~Azərbaycan Respublikası Ali Məhkəməsinin sədrinin müavinləri,~~ Azərbaycan Respublikası apellyasiya məhkəmələrinin sədr müavinləri, Məhkəmə-Hüquq Şurasının üzvləri, ~~Azərbaycan Respublikası Hesablama Palatasının sədr müavinləri, Azərbaycan Respublikası Hesablama Palatasının auditorları~~; Azərbaycan Respublikası mərkəzi icra hakimiyyəti orqanları rəhbərlərinin müavinləri, Azərbaycan Respublikasının mərkəzi icra hakimiyyəti orqanlarına bərabər tutulan orqanların rəhbərləri və müavinləri, Azərbaycan Respublikası Mərkəzi Seçki Komissiyasının, Azərbaycan Respublikası Milli Televiziya və Radio Şurasının sədr müavinləri, Azərbaycan Milli Elmlər Akademiyasının vitse-prezidentləri, Azərbaycan Respublikası Baş prokurorunun müavinləri, Azərbaycan Respublikası Nazirlər Kabinetinin yanında olan icra hakimiyyəti orqanlarının rəhbərləri və müavinləri, Azərbaycan Respublikasının yüksək səviyyəli nümayəndə heyətlərinin xarici ölkələrə rəsmi səfərləri ilə bağlı protokol tədbirlərinin həyata keçirilməsi ilə əlaqədar ezam olunan şəxslər[14]	30

Qeydlər:

1. Cədvəlin 1-ci və 2-ci hissələrində göstərilən şəxslərə xidməti ezamiyyətlər zamanı ezamiyyə xərclərinin 1 günlük normasının 10 faizi məbləğində hər gün üçün nümayəndəlik xərcləri ödənilir. Həmin şəxslərə və diplomatik fəaliyyəti dövründə Fövqəladə və Səlahiyyətli Səfir diplomatik rütbəsi və ya vəzifəsi olanlara, eləcə də Azərbaycan Respublikasının Prezidenti tərəfindən yaradılmış hökumətlərarası komissiyaların tərkibinə daxil olan şəxslərə nəqliyyat xərcləri təyyarə üçün “biznes klass”, dəmiryol qatarları üçün “biznes klass” və ya “2 yerli kupeli yumşaq vaqon” tarifləri ilə ödənilir, bütün digər hallarda nəqliyyat xərcləri təyyarə üçün “ekonom klass”, dəmiryol qatarları üçün “4 yerli kupeli vaqon” tarifləri ilə ödənilir.[15]

2. Azərbaycan Respublikasının yüksək səviyyəli nümayəndə heyətlərinin rəhbərləri beynəlxalq tədbirlərdə və ikitərəfli görüşlərdə iştirak etmək üçün xarici ölkələrə ezam olunduqda, qəbul edən tərəfin protokol qaydalarına uyğun olaraq mehmanxanada yerləşdirildikdə, ezamiyyə xərcləri təqdim olunmuş sənədlərə əsasən faktiki mehmanxana xərclərinin 1 günlük məbləği ezamiyyə xərclərinin 1 günlük normasının cədvəldəki əlavələr nəzərə alınmaqla, 60 faizindən çox olduğu hallarda, həmin fərq mehmanxana günləri üçün ezamiyyə xərclərinə əlavə xərc olaraq ödənilir. Bu qayda ilə mehmanxanada yerləşdirilən həmin rəsmi nümayəndə heyətinin digər üzvlərinin ezamiyyə xərcləri təqdim olunmuş sənədlər əsasında müvafiq ölkələr üzrə müəyyən edilmiş ezamiyyə xərclərinin 1 günlük normasından 1,5 dəfədən çox olmamaq şərtilə ödənilir.

3. Cədvəldə göstərilən rəhbər işçilər onlar üçün müəyyən edilmiş əlavələrdən yalnız birini almaq hüququna malikdirlər.

Azərbaycan Respublikası Nazirlər Kabinetinin

2008-ci il 25 yanvar tarixli 14 nömrəli qərarı ilə

TƏSDİQ EDİLMİŞDİR

Azərbaycan Respublikası Nazirlər Kabinetinin qüvvədən düşmüş bəzi qərarlarının

S İ Y A H I S I

1. “Ezamiyyə xərclərinin normaları haqqında” Azərbaycan Respublikası Nazirlər Kabinetinin 2001-ci il 16 mart tarixli 66 nömrəli qərarı (Azərbaycan Respublikasının Qanunvericilik Toplusu, 2001-ci il, №3, maddə 220, №7 maddə 514; 2002-ci il, №7, maddə 453; 2003-cü il, № 9, maddə 532; 2004-cü il, № 12, maddə 1068; 2005-ci il, № 6, maddə 547, №10, maddə 986; 2006-cı il, № 4, maddə 383) 7-ci bəndi istisna olmaqla.

2. “Ezamiyyə xərclərinin normaları haqqında” Azərbaycan Respublikası Nazirlər Kabinetinin 2001-ci il 16 mart tarixli 66 nömrəli qərarına əlavələr edilməsi barədə” Azərbaycan Respublikası Nazirlər Kabinetinin 2001-ci il 26 iyul tarixli 127 nömrəli qərarı (Azərbaycan Respublikasının Qanunvericilik Toplusu, 2001-ci il, № 7, maddə 514).

3. “Ezamiyyə xərclərinin normaları haqqında” Azərbaycan Respublikası Nazirlər Kabinetinin 2001-ci il 16 mart tarixli 66 nömrəli qərarı ilə təsdiq edilmiş “Rəhbər işçilərin ezamiyyətləri ilə əlaqədar ezamiyyə xərcləri normalarına əlavələr və həmin əlavələrin tətbiq olunduğu rəhbər işçilərin kateqoriyası”na əlavə edilməsi barədə” Azərbaycan Respublikası Nazirlər Kabinetinin 2002-ci il 20 iyul tarixli 115 nömrəli qərarı (Azərbaycan Respublikasının Qanunvericilik Toplusu, 2002-ci il, № 7, maddə 453).

4. “Ezamiyyə xərclərinin normaları haqqında” Azərbaycan Respublikası Nazirlər Kabinetinin 2001-ci il 16 mart tarixli 66 nömrəli qərarı ilə təsdiq edilmiş “Rəhbər işçilərin ezamiyyətləri ilə əlaqədar ezamiyyə xərcləri normalarına əlavələr və həmin əlavələrin tətbiq olunduğu rəhbər işçilərin kateqoriyası”na əlavə edilməsi barədə” Azərbaycan Respublikası Nazirlər Kabinetinin 2003-cü il 26 sentyabr tarixli 125 nömrəli qərarı (Azərbaycan Respublikasının Qanunvericilik Toplusu, 2003-cü il, № 9, maddə 532).

5. “Ezamiyyə xərclərinin normaları haqqında” Azərbaycan Respublikası Nazirlər Kabinetinin 2001-ci il 16 mart tarixli 66 nömrəli qərarına əlavələr və dəyişikliklər edilməsi barədə” Azərbaycan Respublikası Nazirlər Kabinetinin 2004-cü il 3 dekabr tarixli 187 nömrəli qərarı (Azərbaycan Respublikasının Qanunvericilik Toplusu, 2004-cü il, № 12, maddə 1068).

6. “Ezamiyyə xərclərinin normaları haqqında” Azərbaycan Respublikası Nazirlər Kabinetinin 2001-ci il 16 mart tarixli 66 nömrəli qərarına əlavə edilməsi barədə” Azərbaycan Respublikası Nazirlər Kabinetinin 2005-ci il 21 iyun tarixli 111 nömrəli qərarı (Azərbaycan Respublikasının Qanunvericilik Toplusu, 2005-ci il, № 6, maddə 547).

7. “Ezamiyyə xərclərinin normaları haqqında” Azərbaycan Respublikası Nazirlər Kabinetinin 2001-ci il 16 mart tarixli 66 nömrəli qərarına dəyişiklik və əlavələr edilməsi barədə” Azərbaycan Respublikası Nazirlər Kabinetinin 2005-ci il 21 oktyabr tarixli 193 nömrəli qərarı (Azərbaycan Respublikasının Qanunvericilik Toplusu, 2005-ci il, № 10, maddə 986).

8. “Ezamiyyə xərclərinin normaları haqqında” Azərbaycan Respublikası Nazirlər Kabinetinin 2001-ci il 16 mart tarixli 66 nömrəli qərarına dəyişikliklər edilməsi barədə” Azərbaycan Respublikası Nazirlər Kabinetinin 2006-cı il 24 aprel tarixli 115 nömrəli qərarı (Azərbaycan Respublikasının Qanunvericilik Toplusu, 2006-cı il, № 4, maddə 383).

QƏRARA EDİLMİŞ DƏYİŞİKLİK VƏ ƏLAVƏLƏRİN SİYAHISI

1. 13 iyun 2008-ci il tarixli 137 nömrəli Azərbaycan Respublikası Nazirlər Kabinetinin Qərarı (Azərbaycan Respublikasının Qanunvericilik Toplusu, 2008-ci il, №6, maddə 589)

2. 24 dekabr 2008-ci il tarixli 280 nömrəli Azərbaycan Respublikası Nazirlər Kabinetinin Qərarı (Azərbaycan Respublikasının Qanunvericilik Toplusu, 2008-ci il, № 12, maddə 1118)

3. 25 yanvar 2011-ci il tarixli 15 nömrəli Azərbaycan Respublikası Nazirlər Kabinetinin Qərarı (Azərbaycan Respublikasının Qanunvericilik Toplusu, 2011-ci il, № 1, maddə 66)

4. 20 sentyabr 2011-ci il tarixli 144 nömrəli Azərbaycan Respublikası Nazirlər Kabinetinin Qərarı (Azərbaycan Respublikasının Qanunvericilik Toplusu, 2011-ci il, № 9, maddə 854)

5. 26 fevral 2013-cü il tarixli 28 nömrəli Azərbaycan Respublikası Nazirlər Kabinetinin Qərarı (Azərbaycan Respublikasının Qanunvericilik Toplusu, 2013-cü il, № 02, maddə 197)

6. 14 oktyabr 2013-cü il tarixli 304 nömrəli Azərbaycan Respublikası Nazirlər Kabinetinin Qərarı (Azərbaycan Respublikasının Qanunvericilik Toplusu, 2013-cü il, № 10, maddə 1222)

7. 13 avqust 2015-ci il tarixli 276 nömrəli Azərbaycan Respublikası Nazirlər Kabinetinin Qərarı (Azərbaycan Respublikasının Qanunvericilik Toplusu, 2015-ci il, №8, maddə 962)

8. 7 mart 2018-ci il tarixli 81 nömrəli Azərbaycan Respublikası Nazirlər Kabinetinin Qərarı (“Xalq” qəzeti 11 mart 2018-ci il, № 55, Azərbaycan Respublikasının Qanunvericilik Toplusu, 2018-ci il, №3, maddə 592)

9. 20 iyun 2018-ci il tarixli 269 nömrəli Azərbaycan Respublikası Nazirlər Kabinetinin Qərarı (“Xalq” qəzeti, 22 iyun 2018-ci il, № 136, Azərbaycan Respublikasının Qanunvericilik Toplusu, 2018-ci il, № 6, maddə 1368)

10. 30 aprel 2019-cu il tarixli 195 nömrəli Azərbaycan Respublikası Nazirlər Kabinetinin Qərarı (“Xalq” qəzeti, 1 may 2019-cu il, № 94, Azərbaycan Respublikasının Qanunvericilik Toplusu, 2019-cu il, №4, maddə 786)

11. 27 yanvar 2021-ci il tarixli 13 nömrəli Azərbaycan Respublikası Nazirlər Kabinetinin Qərarı (“Xalq” qəzeti, 30 yanvar 2021-ci il, № 21)

İSTİFADƏ OLUNMUŞ MƏNBƏ SƏNƏDLƏRİNİN SİYAHISI

[1] 20 iyun 2018-ci il tarixli 269 nömrəli Azərbaycan Respublikası Nazirlər Kabinetinin Qərarı (“Xalq” qəzeti, 22 iyun 2018-ci il, № 136, Azərbaycan Respublikasının Qanunvericilik Toplusu, 2018-ci il, № 6, maddə 1368) ilə 1-ci hissədə “65,0” rəqəmləri “90,0” rəqəmləri ilə, “50,0” rəqəmləri “70,0” rəqəmləri ilə və “45,0” rəqəmləri “65,0” rəqəmləri ilə əvəz edilmişdir.

[2] 20 sentyabr 2011-ci il tarixli 144 nömrəli Azərbaycan Respublikası Nazirlər Kabinetinin Qərarı ilə 1-ci hissə yeni redaksiyada verilmişdir.

Əvvəlki redaksiyada deyilirdi:

1. Azərbaycan Respublikasının ərazisində ezamiyyə xərclərinin 1 günlük norması Bakı şəhərində 35,0 manat, Gəncə, Sumqayıt və Naxçıvan şəhərlərində 25,0 manat, respublika tabeli digər şəhərlərdə 20,0 manat, rayon mərkəzlərində, şəhər tipli qəsəbələrdə və kəndlərdə 15,0 manat müəyyən edilsin.

[3] 20 sentyabr 2011-ci il tarixli 144 nömrəli Azərbaycan Respublikası Nazirlər Kabinetinin Qərarı (Azərbaycan Respublikasının Qanunvericilik Toplusu, 2011-ci il, № 9, maddə 854) ilə yeni məzmunda 1-1-ci hissə əlavə edilmişdir.

27 yanvar 2021-ci il tarixli 13 nömrəli Azərbaycan Respublikası Nazirlər Kabinetinin Qərarı (“Xalq” qəzeti, 30 yanvar 2021-ci il, № 21) ilə 1-1-ci hissə ləğv edilmişdir.

[4] 26 fevral 2013-cü il tarixli 28 nömrəli Azərbaycan Respublikası Nazirlər Kabinetinin Qərarı (Azərbaycan Respublikasının Qanunvericilik Toplusu, 2013-cü il, № 02, maddə 197) ilə 3-cü hissədə “Rəhbər işçilərin” sözlərindən sonra “xarici ölkələrə” sözləri əlavə edilmişdir.

[5] 20 sentyabr 2011-ci il tarixli 144 nömrəli Azərbaycan Respublikası Nazirlər Kabinetinin Qərarı (Azərbaycan Respublikasının Qanunvericilik Toplusu, 2011-ci il, № 9, maddə 854) ilə 6-cı hissədə “5,0” rəqəmi “10,0” rəqəmi ilə əvəz edilmişdir.

20 iyun 2018-ci il tarixli 269 nömrəli Azərbaycan Respublikası Nazirlər Kabinetinin Qərarı (“Xalq” qəzeti, 22 iyun 2018-ci il, № 136, Azərbaycan Respublikasının Qanunvericilik Toplusu, 2018-ci il, № 6, maddə 1368) ilə 6-cı hissədə “10,0” rəqəmləri “15,0” rəqəmləri ilə əvəz edilmişdir.

[6] 27 yanvar 2021-ci il tarixli 13 nömrəli Azərbaycan Respublikası Nazirlər Kabinetinin Qərarı (“Xalq” qəzeti, 30 yanvar 2021-ci il, № 21) ilə yeni redaksiyada 7-1-ci hissə əlavə edilmişdir.

[7] 13 avqust 2015-ci il tarixli 276 nömrəli Azərbaycan Respublikası Nazirlər Kabinetinin Qərarı (Azərbaycan Respublikasının Qanunvericilik Toplusu, 2015-ci il, №8, maddə 962) ilə 1 nömrəli əlavə - “Xarici ölkələrə ezamiyyə xərclərinin 1 günlük normaları”nın 41-ci hissəsində “Çernoqoriya” sözü “Monteneqro” sözü ilə əvəz edilmişdir.

[8] 13 avqust 2015-ci il tarixli 276 nömrəli Azərbaycan Respublikası Nazirlər Kabinetinin Qərarı (Azərbaycan Respublikasının Qanunvericilik Toplusu, 2015-ci il, №8, maddə 962) ilə 1 nömrəli əlavə - “Xarici ölkələrə ezamiyyə xərclərinin 1 günlük normaları”nın yeni məzmunda 68-1-ci hissə əlavə edilmişdir.

[9] 13 avqust 2015-ci il tarixli 276 nömrəli Azərbaycan Respublikası Nazirlər Kabinetinin Qərarı (Azərbaycan Respublikasının Qanunvericilik Toplusu, 2015-ci il, №8, maddə 962) ilə 1 nömrəli əlavə - “Xarici ölkələrə ezamiyyə xərclərinin 1 günlük normaları”nın 41-ci hissəsində 92-ci hissədə “Samoa” sözü “Butan” sözü ilə əvəz edilmişdir.

[10] 13 avqust 2015-ci il tarixli 276 nömrəli Azərbaycan Respublikası Nazirlər Kabinetinin Qərarı (Azərbaycan Respublikasının Qanunvericilik Toplusu, 2015-ci il, №8, maddə 962) ilə 1 nömrəli əlavə - “Xarici ölkələrə ezamiyyə xərclərinin 1 günlük normaları”nın yeni məzmunda 92-1-ci hissə əlavə edilmişdir.

[11] 26 fevral 2013-cü il tarixli 28 nömrəli Azərbaycan Respublikası Nazirlər Kabinetinin Qərarı (Azərbaycan Respublikasının Qanunvericilik Toplusu, 2013-cü il, № 02, maddə 197) 2 nömrəli əlavə yeni redaksiyada verilmişdir.

Əvvəlki redaksiyada deyilirdi:

~~Rəhbər işçilərin ezamiyyətləri ilə əlaqədar ezamiyyə xərclərinin 1 günlük normasına əlavələr və həmin əlavələrin tətbiq olunduğu rəhbər işçilərin kateqoriyası~~

~~Sıra~~ ~~№-si~~	~~Rəhbər işçinin vəzifəsi~~	~~Əlavə~~ ~~(faizlə)~~
1	2	3
1.	Azərbaycan Respublikası Konstitusiya Məhkəməsinin və Azərbaycan Respublikası Ali Məhkəməsinin sədri; Azərbaycan Respublikası Baş nazirinin müavinləri; Azərbaycan Respublikasının Baş Prokuroru; Azərbaycan Respublikasının İnsan hüquqları üzrə müvəkkili (Ombudsman); Azərbaycan Respublikası Hesablama Palatasının sədri, Hesablama Palatası sədr müavini, auditorları; Azərbaycan Respublikasının Mərkəzi Seçki Komissiyasının sədri; Azərbaycan Respublikası Milli Məclisinin deputatları; Azərbaycan Respublikası Milli Məclis Aparatının rəhbəri, Azərbaycan Respublikası Hesablama Palatası Aparatının rəhbəri; Azərbaycan Respublikası Nazirlər Kabineti Aparatının rəhbəri; mərkəzi icra hakimiyyəti orqanlarının rəhbərləri, Azərbaycan Respublikasının Milli Televiziya və Radio Şurasının sədri~~[11]~~	50
2.	Azərbaycan Respublikası Konstitusiya Məhkəməsinin sədr müavini və hakimləri; Azərbaycan Respublikası Ali Məhkəməsinin sədr müavini; Azərbaycan Respublikası Baş Prokurorunun müavinləri; Azərbaycan Respublikası Hesablama Palatasının sədr müavini və auditorları; Azərbaycan Respublikası Mərkəzi Seçki Komissiyasının sədr müavini; Azərbaycan Respublikası Apellyasiya məhkəmələrinin sədrləri və sədr müavinləri; Məhkəmə-Hüquq Şurasının üzvləri; ağır cinayətlər məhkəmələrinin sədrləri və sədr müavinləri; mərkəzi icra hakimiyyəti orqanları rəhbərlərinin müavinləri, Azərbaycan Respublikasının Milli Televiziya və Radio Şurası sədrinin müavini~~[11]~~	30
3.	Azərbaycan Respublikasının dövlət və hökumət səviyyəsində rəsmi nümayəndə heyətlərinin xarici ölkələrə rəsmi səfərləri ilə bağlı protokol tədbirlərinin həyata keçirilməsi ilə əlaqədar ezam olunan şəxslər	25

~~Qeyd.~~

Cədvəlin 1-ci bəndində göstərilən şəxslərə xidməti ezamiyyətlər zamanı ezamiyyə xərclərinin 1 günlük normasının 10 faizi məbləğində hər gün üçün nümayəndəlik xərcləri ödənilir. Həmin şəxslərə və diplomatik fəaliyyəti dövründə Fövqəladə və Səlahiyyətli Səfir dərəcəsi olanlara~~, eləcə də Azərbaycan Respublikasının Prezidenti tərəfindən yaradılmış hökumətlərarası komissiyaların tərkibinə daxil olan şəxslərə~~ ~~nəqliyyat xərcləri təyyarə üçün~~ “~~biznes klass~~”~~, dəmiryol qatarları üçün~~ “~~biznes klass~~” ~~və ya~~ “~~2 yerli kupeli yumşaq vaqon~~” ~~tarifləri ilə ödənilir, bütün digər hallarda nəqliyyat xərcləri təyyarə üçün~~ “~~ekonom klass~~”~~, dəmiryol qatarları üçün~~ “~~4 yerli kupeli vaqon~~” tarifləri ilə ödənilir. [11]

Azərbaycan Respublikasının dövlət və hökumət səviyyəsində rəsmi nümayəndə heyətinin rəhbərləri beynəlxalq tədbirlərdə və ikitərəfli görüşlərdə iştirak etmək üçün xarici ölkələrə ezam olunduqda, qəbul edən tərəfin protokol qaydalarına uyğun olaraq mehmanxanada yerləşdirildikdə, ezamiyyə xərcləri təqdim olunmuş sənədlərə əsasən faktiki mehmanxana xərclərinin 1 günlük məbləği ezamiyyə xərclərinin 1 günlük normasının cədvəldəki əlavələr nəzərə alınmaqla 60 faizindən çox olduğu hallarda, həmin fərq mehmanxana günləri üçün ezamiyyə xərclərinə əlavə xərc olaraq ödənilir. Bu qayda ilə mehmanxanada yerləşdirilən həmin rəsmi nümayəndə heyətinin digər üzvlərinin ezamiyyə xərcləri təqdim olunmuş sənədlər əsasında müvafiq ölkələr üzrə müəyyən edilmiş ezamiyyə xərclərinin 1 günlük normasından 1,5 dəfədən çox olmamaq şərti ilə ödənilir.

~~Dövlət və hökumət nümayəndə heyətinə Azərbaycan Respublikasının Hökuməti adından çıxış etmək səlahiyyəti və ya tapşırığı verilmiş nümayəndə heyətləri aid edilir.~~

~~Cədvəldə göstərilən rəhbər işçilər onlar üçün müəyyən edilmiş əlavələrdən yalnız birini almaq hüququna malikdirlər.~~

[12] 7 mart 2018-ci il tarixli 81 nömrəli Azərbaycan Respublikası Nazirlər Kabinetinin Qərarı (“Xalq” qəzeti 11 mart 2018-ci il, № 55, Azərbaycan Respublikasının Qanunvericilik Toplusu, 2018-ci il, №3, maddə 592) ilə 2 nömrəli əlavə – “Rəhbər işçilərin xarici ölkələrə ezamiyyətləri ilə əlaqədar ezamiyyə xərclərinin 1 günlük normasına əlavələr və həmin əlavələrin tətbiq olunduğu rəhbər işçilərin kateqoriyası”nın cədvəlində 1-ci hissəyə “Məhkəməsinin” sözündən sonra “, Azərbaycan Respublikası Ali Məhkəməsinin” sözləri əlavə edilmişdir.

[13] 14 oktyabr 2013-cü il tarixli 304 nömrəli Azərbaycan Respublikası Nazirlər Kabinetinin Qərarı (Azərbaycan Respublikasının Qanunvericilik Toplusu, 2013-cü il, № 10, maddə 1222) ilə cədvəlin 2-ci hissəsinə “Azərbaycan Respublikası mərkəzi icra hakimiyyəti orqanlarının rəhbərləri” sözlərindən sonra “, Azərbaycan Respublikası Hesablama Palatasının sədrinin müavinləri, Azərbaycan Respublikası Hesablama Palatasının auditorları” sözləri əlavə edilmişdir.

7 mart 2018-ci il tarixli 81 nömrəli Azərbaycan Respublikası Nazirlər Kabinetinin Qərarı (“Xalq” qəzeti 11 mart 2018-ci il, № 55, Azərbaycan Respublikasının Qanunvericilik Toplusu, 2018-ci il, №3, maddə 592) ilə 2 nömrəli əlavə – “Rəhbər işçilərin xarici ölkələrə ezamiyyətləri ilə əlaqədar ezamiyyə xərclərinin 1 günlük normasına əlavələr və həmin əlavələrin tətbiq olunduğu rəhbər işçilərin kateqoriyası”nın cədvəlində 2-ci hissədən “Azərbaycan Respublikası Ali Məhkəməsinin,” sözləri çıxarılmışdır və həmin hissəyə “Konstitusiya Məhkəməsi” sözlərindən sonra “, Azərbaycan Respublikasının Ali Məhkəməsi” sözləri, “Konstitusiya Məhkəməsinin,” sözlərindən sonra isə “Azərbaycan Respublikası Ali Məhkəməsinin,” sözləri əlavə edilmişdir.

30 aprel 2019-cu il tarixli 195 nömrəli Azərbaycan Respublikası Nazirlər Kabinetinin Qərarı (“Xalq” qəzeti, 1 may 2019-cu il, № 94, Azərbaycan Respublikasının Qanunvericilik Toplusu, 2019-cu il, №4, maddə 786) ilə “Rəhbər işçilərin xarici ölkələrə ezamiyyətləri ilə əlaqədar ezamiyyə xərclərinin 1 günlük normasına əlavələr və həmin əlavələrin tətbiq olunduğu rəhbər işçilərin kateqoriyası”nın cədvəlinin 2-ci hissəsinə “Azərbaycan Respublikası Milli Televiziya və Radio Şurasının sədrləri” sözlərindən sonra “, Azərbaycan Milli Elmlər Akademiyasının prezidenti” sözləri və 3-cü hissəsinə “Azərbaycan Respublikası Milli Televiziya və Radio Şurasının sədr müavinləri” sözlərindən sonra “, Azərbaycan Milli Elmlər Akademiyasının vitse-prezidentləri” sözləri əlavə edilmişdir.

[14] 14 oktyabr 2013-cü il tarixli 304 nömrəli Azərbaycan Respublikası Nazirlər Kabinetinin Qərarı (Azərbaycan Respublikasının Qanunvericilik Toplusu, 2013-cü il, № 10, maddə 1222) ilə cədvəlin 3-cü hissəsindən “Azərbaycan Respublikası Hesablama Palatasının sədr müavinləri, Azərbaycan Respublikası Hesablama Palatasının auditorları” sözləri çıxarılmışdır.

7 mart 2018-ci il tarixli 81 nömrəli Azərbaycan Respublikası Nazirlər Kabinetinin Qərarı (“Xalq” qəzeti 11 mart 2018-ci il, № 55, Azərbaycan Respublikasının Qanunvericilik Toplusu, 2018-ci il, №3, maddə 592) ilə 2 nömrəli əlavə – “Rəhbər işçilərin xarici ölkələrə ezamiyyətləri ilə əlaqədar ezamiyyə xərclərinin 1 günlük normasına əlavələr və həmin əlavələrin tətbiq olunduğu rəhbər işçilərin kateqoriyası”nın cədvəlində 3-cü hissədən “Azərbaycan Respublikası Ali Məhkəməsinin sədrinin müavinləri,” sözləri çıxarılmışdır və həmin hissəyə “Konstitusiya Məhkəməsinin” sözlərindən sonra “, Azərbaycan Respublikası Ali Məhkəməsinin” sözləri əlavə edilmişdir.

[15] 14 oktyabr 2013-cü il tarixli 304 nömrəli Azərbaycan Respublikası Nazirlər Kabinetinin Qərarı (Azərbaycan Respublikasının Qanunvericilik Toplusu, 2013-cü il, № 10, maddə 1222) ilə “Qeydlər”in 1-ci hissəsində “dərəcəsi” sözü “diplomatik rütbəsi və ya vəzifəsi” sözləri ilə əvəz edilmişdir.