“Elektron
sağlamlıq kartı” sisteminin tətbiqi Qaydaları”nın
təsdiq edilməsi haqqında
AZƏRBAYCAN
RESPUBLİKASI NAZİRLƏR KABİNETİNİN QƏRARI
Azərbaycan Respublikası Prezidentinin 2005-ci il 21 oktyabr
tarixli 1055 nömrəli Sərəncamı ilə təsdiq
edilmiş “Azərbaycan Respublikasında rabitə və
informasiya texnologiyalarının inkişafı üzrə
2005-2008-ci illər üçün Dövlət
Proqramı”nın (Elektron Azərbaycan)” 7.3.10-7.3.12-ci
bəndlərinin icrasını təmin etmək
məqsədilə Azərbaycan Respublikasının
Nazirlər Kabineti qərara alır:
1. “Elektron sağlamlıq kartı” sisteminin tətbiqi
Qaydaları” təsdiq edilsin (əlavə olunur).
2. Bu qərar imzalandığı gündən
qüvvəyə minir.
Azərbaycan
Respublikasının Baş naziri A.RASİZADƏ
Bakı şəhəri, 12 iyun
2006-cı il
¹ 143
|
Azərbaycan
Respublikası Nazirlər Kabinetinin 2006-cı
il 12 iyun tarixli 143 nömrəli qərarı ilə TƏSDİQ
EDİLMİŞDİR |
“Elektron
sağlamlıq kartı” sisteminin tətbiqi
QAYDALARI
1.
ÜMUMİ MÜDDƏALAR
1.1. Bu Qaydalar Azərbaycan Respublikası Prezidentinin
2005-ci il 21 oktyabr tarixli 1055 nömrəli Sərəncamı
ilə təsdiq edilmiş “Azərbaycan Respublikasında
rabitə və informasiya texnologiyalarının inkişafı
üzrə 2005- 2008-ci illər üçün Dövlət
Proqramı”nın (Elektron Azərbaycan)” 7.3.10- 7.3.12-ci
bəndlərinə əsasən hazırlanmışdır
və “Elektron sağlamlıq kartı” (bundan sonra -
sağlamlıq kartı) sisteminin və tibbi elektron
registrlərin yaradılması qaydalarını
müəyyən edir.
1.2. Sağlamlıq kartı sisteminin tətbiqi müvafiq
elektron registrlərin hazırlanması vasitəsilə
vətəndaşların sağlamlığı
vəziyyətinə nəzarət sisteminin
təkmilləşdirilməsini və operativ
şəkildə şəxslərin sağlamlığı
barədə məlumat bankının yaradılmasını
təmin edir.
1.3. Azərbaycan Respublikasının Səhiyyə
Nazirliyi tərəfindən tətbiq olunan sağlamlıq
kartı sistemi şəxsi, tibbi və sığorta
məlumatlarını özündə saxlayan elektron
informasiya sistemidir.
1.4. Sağlamlıq kartı sisteminə daxil edilmiş
informasiya Azərbaycan Respublikası Səhiyyə Nazirliyinin
İnformasiya Mərkəzində cəmləşdirilir.
1.5. Kartda olan informasiya təcili tibbi yardım
maşınlarında, xəstəxanaların qeydiyyat
şöbələrində, laboratoriyalarda, apteklərdə
və s. kompüterlərə qoşulmuş xüsusi
qurğular vasitəsilə oxunur və dəyişdirilir.
1.6. Sağlamlıq kartı sistemində olan
məlumatlar (xəstəlik tarixi, cari istifadə edilən
dərman preparatları, peyvəndlər, tibbi sığorta
və s.) kart sahibinə operativ və dəqiq müayinə
olunmaq imkanı yaradır.
2.
SAĞLAMLIQ KARTI SİSTEMİNİN STRUKTURU
2.1. Sağlamlıq kartı sistemi Mərkəzi
İnformasiya Bazasının və müvafiq tibb
müəssisələrinin proqram təminatlarından,
müəssisənin personal kompüterinə qoşulmuş
xüsusi oxuyucu qurğulardan və mikroprosessorlu çip
ilə təchiz edilmiş, saxtalaşdırılması
mümkün olmayan elektron kartlardan ibarətdir.
2.2. Tibb müəssisəsinin rəhbəri
tərəfindən sağlamlıq kartı sisteminin
proqramı ilə işləmək hüququ verilən
əməkdaş proqrama daxil olaraq, kart sahibinin kartında
əməliyyatlar aparır. Aparılmış
əməliyyatlar haqqında məlumat proqramda qeyd olunur.
2.3. Gün ərzində aparılan əməliyyatlar
elektron şəkildə İnformasiya Mərkəzinə
göndərilir.
3.
SAĞLAMLIQ KARTI SİSTEMİNİN REGİSTRİNİN
YARADILMASI VƏ APARILMASI
3.1. Vətəndaşların sağlamlıq
vəziyyətinin qeydiyyatının aparılması
məqsədilə Azərbaycan Respublikası Səhiyyə
Nazirliyinin İnformasiya Mərkəzində sağlamlıq
kartı sisteminin elektron registri bankı yaradılır.
3.2. Registrə və sağlamlıq kartına
aşağıdakı məlumatlar daxil edilir:
- şəxs haqqında;
- tibb müəssisəsi haqqında;
- immunlaşdırma haqqında;
- qanunvericiliklə müəyyən olunmuş
digər tibbi məlumatlar.
3.3. Resept şəxslərin elektron
sağlamlıq kartına onun FİN-i vasitəsilə
inteqrasiya olunur.[1]
4.
SAĞLAMLIQ KARTLARININ HAZIRLANMASI VƏ ONLARIN VERİLMƏ
QAYDALARI
4.1. Sağlamlıq kartları Azərbaycan
Respublikasının Səhiyyə Nazirliyi tərəfindən
müəyyənləşdirilmiş, xüsusi
avadanlıqlarla təmin olunmuş müəssisələr
tərəfindən hazırlanır və fiziki
şəxslərə verilməsi üçün tibb
müəssisələrinə paylanılır.
4.2. Sağlamlıq kartı sistemi tibb
müəssisələri tərəfindən təqdim
edilmiş məlumatlar əsasında tərtib edilir.
4.3. Müayinə nəticələrini tibb
müəssisəsi yerində yeniləşdirə
bilmədiyi təqdirdə, bu dəyişiklik İnformasiya
Mərkəzinə göndərilir və kart sahibinin
kartına tibb müəssisəsi tərəfindən sonradan
daxil edilir.
4.4. Sağlamlıq kartını itirən və ya
kartı zədələnmiş şəxslər
üçün yeni kart hazırlanır və İnformasiya
Mərkəzində saxlanılan informasiya yeni kartın
yaddaşına yazılır. İtirilmiş və ya
zədələnmiş kartlar istifadəsi qadağan
olunmuş kartlar siyahısına daxil edilərək,
İnformasiya Mərkəzinə göndərilir və
bloklanır.
5.
SAĞLAMLIQ KARTININ SAHİBİ HAQQINDA İNFORMASİYANIN
ƏLDƏ EDİLMƏSİ VƏ ONUN
MƏXFİLİYİ
5.1. Sağlamlıq kartının sahibi haqqında
informasiyanın əldə edilməsi və dəyişikliklərin
aparılması məqsədilə sistemə yalnız tibb
müəssisəsinin rəhbərliyi tərəfindən
müvafiq icazəsi olan şəxslər daxil ola
bilərlər.
5.1-1. Elektron sağlamlıq kartında
olan pasport və şəxsiyyət vəsiqələrinin
doldurulmasına aid məlumatlar “Giriş-çıxış
və qeydiyyat” idarələrarası
avtomatlaşdırılmış məlumat-axtarış
sisteminə daxil edilir.[2]
5.1-2. 15 yaşı tamam olmamış Azərbaycan
Respublikası vətəndaşının elektron
sağlamlıq kartı üzrə məlumatları onun
fərdi identifikasiya kartının elektron
daşıyıcısında (çipdə)
yerləşdirilməsi üçün Azərbaycan
Respublikası Əhalisinin Dövlət Reyestri
avtomatlaşdırılmış qeydiyyat informasiya
sisteminə ötürülür.[3]
5.1-3. Lisenziyanın və
icazənin, onun dublikatının və əlavəsinin
verilməsinin, lisenziyanın və icazənin yenidən rəsmiləşdirilməsinin,
dayandırılmasının, bərpasının və ya
ləğvinin “Lisenziyalar və icazələr” portalı
vasitəsilə həyata keçirilməsini təmin
etmək üçün avtomobil sürücüsünün
sonuncu tibbi müayinədən keçməsi tarixi və
sağlamlıq vəziyyəti barədə məlumatlar Elektron Hökumət İnformasiya Sistemi
vasitəsilə “Lisenziyalar və
icazələr” portalına ötürülür.[4]
5.2. Qanunla müəyyənləşdirilmiş
konfidensial məlumatların yayılması qadağandır.
6.
SAĞLAMLIQ KARTI SİSTEMİNİN TƏCHİZATI VƏ
MALİYYƏLƏŞDİRİLMƏSİ
6.1. Sağlamlıq kartı sisteminin fəaliyyəti
üçün tibb müəssisələri avadanlıqla
və digər ləvazimatlarla təchiz olunurlar.
6.2. Sağlamlıq kartı sisteminin tətbiqi
üçün tələb olunan xərclər müvafiq
illər üzrə dövlət büdcəsinin
“səhiyyə” bölməsinin mərkəzləşdirilmiş
xərclərində nəzərdə tutulmuş vəsait
dairəsində həyata keçirilir.
İSTİFADƏ OLUNMUŞ MƏNBƏ
SƏNƏDLƏRİNİN SİYAHISI
1.
1 iyul
2008-ci il tarixli 150 nömrəli Azərbaycan Respublikası
Nazirlər Kabinetinin Qərarı (Azərbaycan Respublikasının Qanunvericilik Toplusu,
2008-ci il, ¹ 7, maddə 672)
2.
22 fevral 2016-cı il tarixli 78 nömrəli Azərbaycan Respublikası Nazirlər
Kabinetinin Qərarı (Azərbaycan
Respublikasının Qanunvericilik Toplusu, 2016-cı il, ¹ 2,
maddə 390)
3.
17 sentyabr 2018-ci il tarixli 397 nömrəli Azərbaycan Respublikası Nazirlər Kabinetinin
Qərarı (“Xalq” qəzeti, 18
sentyabr 2018-ci il, ¹ 208, Azərbaycan Respublikasının
Qanunvericilik Toplusu, 2018-ci il, ¹ 9, maddə 1925)
4.
28 aprel 2022-ci il tarixli 177 nömrəli Azərbaycan Respublikası Nazirlər Kabinetinin
Qərarı (“Xalq” qəzeti, 1
may 2022-ci il, ¹ 91,Azərbaycan
Respublikasının Qanunvericilik Toplusu, 2022-ci il, ¹ 4, maddə 423)
5. 25 sentyabr 2024-cü il tarixli 443 nömrəli Azərbaycan Respublikası Nazirlər
Kabinetinin Qərarı (Azərbaycan Dövlət İnformasiya
Agentliyinin (AZƏRTAC-ın) rəsmi internet saytı, 27 sentyabr 2024-cü il, “Azərbaycan” qəzeti, 29 sentyabr
2024-cü il, ¹ 213,
Azərbaycan Respublikasının Qanunvericilik Toplusu, 2024-cü
il, ¹ 9, maddə 1106)
6. 27 oktyabr 2026-cı il tarixli 361 nömrəli Azərbaycan Respublikası Nazirlər
Kabinetinin Qərarı (Azərbaycan Dövlət İnformasiya
Agentliyinin (AZƏRTAC-ın) rəsmi internet saytı, 28 oktyabr 2026-cı il, “Azərbaycan” qəzeti, 3 noyabr
2026-cı il, ¹ 202)
QƏRARA EDİLMİŞ
DƏYİŞİKLİK VƏ ƏLAVƏLƏRİN
SİYAHISI
[1] 25 sentyabr 2024-cü il tarixli 443 nömrəli
Azərbaycan Respublikası Nazirlər Kabinetinin Qərarı (Azərbaycan
Dövlət İnformasiya Agentliyinin (AZƏRTAC-ın)
rəsmi internet saytı, 27 sentyabr
2024-cü il,
“Azərbaycan” qəzeti, 29 sentyabr 2024-cü il, ¹ 213, Azərbaycan
Respublikasının Qanunvericilik Toplusu, 2024-cü il, ¹ 9,
maddə 1106) ilə “Elektron sağlamlıq
kartı” sisteminin tətbiqi Qaydaları”na yeni
məzmunda 3.3-cü bənd əlavə edilmişdir.
[2] 1 iyul 2008-ci il tarixli 150 nömrəli Azərbaycan Respublikası
Nazirlər Kabinetinin Qərarı (Azərbaycan Respublikasının Qanunvericilik Toplusu,
2008-ci il, ¹ 7, maddə 672) ilə “Elektron sağlamlıq
kartı” sisteminin tətbiqi Qaydaları”na 5.1-1-ci bənd
əlavə edilmişdir.
[3] 22 fevral 2016-cı il tarixli 78 nömrəli
Azərbaycan Respublikası Nazirlər Kabinetinin Qərarı (Azərbaycan Respublikasının
Qanunvericilik Toplusu, 2016-cı il, ¹ 2, maddə 390) ilə “Elektron sağlamlıq
kartı” sisteminin tətbiqi Qaydaları”na yeni məzmunda
5.1-2-ci bənd əlavə edilmişdir.
28 aprel 2022-ci il tarixli 177
nömrəli Azərbaycan Respublikası Nazirlər
Kabinetinin Qərarı (“Xalq”
qəzeti, 1 may 2022-ci il, ¹ 91,Azərbaycan Respublikasının Qanunvericilik Toplusu,
2022-ci il, ¹ 4, maddə 423) ilə “Elektron sağlamlıq kartı” sisteminin tətbiqi
Qaydaları”nın 5.1-2-ci bəndi ləğv edilmişdir.
[4] 17 sentyabr 2018-ci il tarixli 397 nömrəli Azərbaycan Respublikası Nazirlər Kabinetinin
Qərarı (“Xalq” qəzeti, 18
sentyabr 2018-ci il, ¹ 208, Azərbaycan Respublikasının
Qanunvericilik Toplusu, 2018-ci il, ¹ 9, maddə 1925) ilə “Elektron sağlamlıq kartı” sisteminin
tətbiqi Qaydaları”na yeni məzmunda 5.1-3-cü bənd
əlavə edilmişdir.
27 oktyabr 2026-cı il tarixli 361 nömrəli Azərbaycan Respublikası Nazirlər
Kabinetinin Qərarı (Azərbaycan Dövlət İnformasiya
Agentliyinin (AZƏRTAC-ın) rəsmi internet saytı, 28 oktyabr 2026-cı il, “Azərbaycan” qəzeti, 3 noyabr
2026-cı il, ¹ 202) ilə “Elektron
sağlamlıq kartı” sisteminin tətbiqi Qaydaları”nın
5.1-3-cü bəndində “Elektron
hökumət” portalı vasitəsilə” sözləri “Elektron Hökumət İnformasiya
Sistemi vasitəsilə” sözləri ilə əvəz
edilmişdir.